今個禮拜冇咩猛碟見街，較可觀只有占基利套《衰鬼上帝》同韓國恐怖片《姊魅情深》，碰啱一套講PartTime上帝，另一套就玩懸疑恐怖。雖然兩者片種各走極端，打正對台，不過同樣精采，開心、哲學、恐怖、驚慄一次過滿足你。
文：梁啟成
《衰鬼上帝》劇情其實好簡單；一個小人物每遇倒楣事都埋怨上帝，卒之激嬲由摩根費曼飾演嘅上帝，要佢嘗試擔任上帝嘅難處，自己就去度假。天下從此多事，一堆搞笑事件亦由此發生。衰鬼占基利暫代上帝之職後，一朝得志語無倫次，淨係識得運用特權去滿足自己，醜惡人性表露無遺。到最後不單搞到全城混亂，更因色心起而傷害至愛女友，醒覺後萬念俱灰，後悔非常。經上帝教誨後洗心革面，愛伴侶、愛世人、更愛上帝，大團圓結局。成套戲以大量搞笑橋段作包裝，讓觀眾睇得開心兼過癮，結局寓意深遠，不致淪為無聊片種，值得一睇。
三區碟只設AC3音效，更靚聲嘅dts則欠奉，幸好劇種關係尚算無傷大雅。較有睇頭係Bouns部份，除咗例牌菜搵齊導演、主要角色齊齊現身說法外，亦收錄唔少刪除片段，如占基利頭號死敵Evan燒燶頭、做媒人幫上司Jack搵女友、反轉廚房等，都相當之有趣。最正一Part就係「Outtake」，收錄多個超級搞笑NG鏡頭，如摩根費曼忘記台詞，惟有攬住占基利不停跳舞；新聞主播Evan被整蠱有多個版本，大部份演員面對占基利均忍唔住笑等，都令人捧腹大笑。
號稱有史以來韓國最賣座恐怖片嘅《姊魅情深》，由《三更之回憶》導演金知雲主理，雖然成套戲學足《三更之回憶》咁不停賣弄血腥，不過劇情明顯有板有眼得多，由中段開始疑團湧現，睇得最投入時失驚無神整啲音響嚇吓你，到尾段直頭血漿大平賣，好此道者肯定大呼過癮。未知是否有意，畫面充滿粗糙微粒，畫質只算一般，幸好有dts搭夠，強烈建議欣賞時扭大Hi-Fi音量。
故事主要改編自韓國家傳戶曉嘅姊妹傳說，加入精神分裂疑幻疑真嘅劇情，配合鬼怪及血腥等驚嚇場面，娛樂性頗高。
