張智霖（Chilam）擁有上位的條件，他入行多年，拍過不少電視劇及電影，又出過唱片，但事業成就總是差了一點點；他與女友袁詠儀拍拖接近十二年，但兩人婚事一直只聞樓梯響，何時才會成家立室呢？就在03年完結前，Chilam面前出現不少新契機，相信04年必定有一番新景象。
一切安好 笑看緋聞同聲一歎
張智霖與袁詠儀（靚靚）拍拖接近十二年，其間經歷的風浪不算太多，惟獨是他與佘詩曼（阿佘）合作拍攝無綫劇集《十月初五的月光》時，曾傳過緋聞，最近播出的新劇《西關大少》，Chilam再度與阿佘合作，拍攝期間兩人亦再度傳出緋聞，不過這則花邊新聞並沒有影響他與靚靚之間的感情。
Chilam認為與阿佘的緋聞是一個最好的例子，他說：「睇過《西關大少》，就知當時所講根本就係劇情發生嘅故事，完全冇必要特別去澄清，當然我對於呢啲是是非非，會笑住去面對，但笑容當中夾雜多少無奈。」靚靚並沒有因Chilam與阿佘的緋聞而向男友大興問罪之師，Chilam相信除了因靚靚本身也是圈中人之外，時間亦可證明一切。
一對戀人相處多年，很多時會由最初的激情發展至淡而無味，或是出現七年之癢；可幸這一切並沒有發生在Chilam與靚靚身上，Chilam想了一回說：「經歷過好多階段，只可以講一切安好，多謝關心。」原來這段感情能夠長時間維繫而不褪色，也和他們各有各忙有重要關係，靚靚近年經常往內地拍劇，見面時間少，彼此得以擴闊私人空間。
近年多次傳出Chilam與靚靚已在外國註冊結婚，但遭當事人否認，Chilam以發誓的語氣再一次否認有關消息，他說：「唔結婚同工作無關，我唔會將感情生活同工作掛鈎，呢樣嘢根本就唔需要向大家交代，我想留番啲空間畀自己，唔想講太多感情事，向觀眾交代我嘅工作成績已足夠。」看來Chilam與靚靚現時還未有結婚打算。
雖然如此，Chilam承認靚靚是一直在背後支持他的女人，他坦言說：「佢唔係問題少女，好淡定，大家都成熟，都有幽默感，就算有啲人好煩，愛搞是搞非，但佢𠵱然冇煩氣，我哋從來冇為過緋聞而嗌交。」
組織家庭這類問題，Chilam確實有想過，但他反問說：「點解唔諗自己人生，幾時老，我都有諗過，只係唔想講太多，留番一線空間畀自己。」
Chilam強調不欲將感情事掛在嘴邊，並非擔心影響事業，他說：「一開始就提你拍拖，然後就有好多新聞，結婚、離婚、復合、生仔等等，我只係唔想畀人牽住鼻子走，呢種感覺唔好受。」
然而Chilam卻不曾想過為杜絕流言蜚語，謝絕與靚靚攜手現身的機會，他理直氣壯地說：「率性而為，做人應該真，藝人未必要虛偽，藝術包含真、善、美、缺其一都不可，我做得到。」