自推出以來一直備受車迷追捧嘅法國標緻307車系，最近外國方面就有消息傳出，話廠方正落力為其研製Facelifted新版，並有望於明年中推出咁話！
從預想圖中可以睇到，Facelifted新版307嘅造型，望落較現有型號變得更富吸引力，不但一組頭燈改以雙圓燈作組合外，就連車頭設計亦有改動，以切合車子嘅年輕活力形象，就連一套胎軨亦屬新設計，一份誘人魅力油然而生。至於車廂方面，則暫時未有關於呢方面嘅詳細資料，但相信會與現有型號一樣，來得寬敞闊落之餘，設備配搭亦見有一份實用性。然而，機械配搭亦會略有改動，當中包括有能輸出180匹馬力嘅2.0公升引擎，不過仍有待廠方公布有關資料後方可作實。