汪明荃前晚擔任林敏驄、林敏怡演唱會嘉賓時，羅家英趁機在台上發表愛的宣言，表示阿姐對他十分重要，二人不用結婚也永不分開。而林敏驄則整晚以揶揄人為樂，不過觀眾反應卻十分冷淡。
前晚阿姐到紅館為林敏驄及林敏怡舉行的演唱會擔任壓軸表演嘉賓，林敏驄特地請羅家英出場介紹阿姐，家英即趁機發表愛的宣言。
羅家英說：「啲人成日話我係阿姐後面嘅男人，點解唔話佢係我後面嘅女人？阿姐對我好重要，有我就有佢，有佢就有我，我哋唔會分開，啲人成日問我哋幾時結婚，其實我哋兩心相照，何必在乎一紙婚書呢？」
羅家英續說：「我哋拍拖十五年，結唔結婚唔重要。我會用個老字嚟形容阿姐，因為佢係長青樹，簡直係老來嬌。」事後問羅家英怕不怕阿姐不滿被指老，他說：「我講事實，佢過幾年都擺大壽六十一歲啦，重唔老？」
前晚林敏驄每次介紹嘉賓出場，都盡顯其揶揄人的本色，可惜觀眾未有熱烈反應。當劉小慧穿着西裝外套加Bratop出場時，林敏驄眼望劉小慧的胸部說：「你個女未戒（奶）呀？」到肥媽出場時，他又以霆鋒炒車，肥媽炒餸作介紹。後來林敏驄穿着一件紫色衫出場問觀眾好不好看，有觀眾大叫：「好肉酸呀。」事後問林敏驄怕不怕得罪人，他說：「唔講呢啲講邊啲呀。」
當夏韶聲出場唱林振強填詞的名曲《空櫈》時，林敏怡說：「呢首歌獻畀我一個好戰友，林振強先生雖然唔能夠嚟出席，但個心永遠同我一齊。」事後林敏怡接受訪問提到林振強，她竟說：「我同佢唔熟，冇乜聯絡，只係見過佢太太一次。」
採訪：李珮洳
攝影：何國豪
