靚仔歌手一向號稱𠝹女王，佢唔單只一腳踏兩船，重不時四圍媾女拍吓散拖，但好衰唔衰，佢又唔知自己啲風流史已經揚通街，梗係次次都要撞吓板先心息。一次佢去沙灘曬太陽，當然唔放過昅女嘅機會，成個沙灘好多女仔着住三點式泳衣四圍行，靚仔歌手就睇到四萬咁口心情勁靚，佢重懶有型咁向睇中嘅目標埋手。
咁啱一位做電影嘅幕後靚女都在場，佢一眼就認得靚仔歌手，見佢四圍狩獵，已經忍唔住偷笑，點知冇幾耐靚仔歌手竟然向自己走近，擺出一副懶迷人嘅表情，發揮佢嘅媾女伎倆，又say晒hi咁，以為人哋一定騷佢。點知個靚女已經名花有主，於是對佢冷笑一聲之後就板起塊面走咗去，靚仔歌手食完檸檬重懵盛盛，唔知人哋都係做娛樂圈。
事後靚女同馮仁昭講，即使自己冇老公，都唔會騷靚仔歌手，因為明知佢四圍𠝹女，重有係人都知佢重同個半紅不黑嘅歌手女友一齊，總之𠝹女王稱號佢當之無愧啦！
余文樂噚日去商台出席活動，早幾日凌晨拍新片《精裝無間追女仔》發生醉漢搶警槍事件，樂仔都喺現場，佢話唔係好驚，今次重係佢第一次踏足砵蘭街㖭，問佢有冇乘機喺周圍望女仔，佢就笑住話：「現場有幾十名臨記扮妓女，都唔知邊啲係真邊啲係假。」喂喂喂！問你有冇望女仔呀，都冇人叫你分真假妓女！
陳法蓉同尹天照噚日去元朗打wargame為新劇宣傳，陳法蓉事先已聲明叫啲男演員唔好射面，但尹天照仍然向佢攻擊，好彩只係射咗啲橄欖油落佢個口，但佢都即刻對尹天照起飛腳報仇，重解釋自己一向好男仔頭，係啲人以為佢係美女
久未露面嘅吳家麗，噚日去到楊玉梅有份投資嘅日式餐館分店做開幕嘉賓，風采依然嘅佢，當被問到現時有冇男友時，佢就兜個大圈唔答，重話：「我男性朋友就有好多。」而主人家楊玉梅個拍檔兼男友鄧先生亦都好怕醜，一直唔肯同女友合照，楊玉梅重話雖然𠵱家做生意，但係做戲先係佢嘅正業，唔通楊玉梅搞生意係為興趣？
好鍾意去日本嘅陳冠希，前嗰排又去咗日本接受雜誌訪問，重同靚女田中麗奈對談一番㖭！陳冠希話麗奈出道拍橙汁廣告時已有留意佢，咁咪即係睇住麗奈大？唔知算唔算係fans呢？而麗奈就話睇咗《無間道》第一集，覺得陳冠希嘅角色都好出位，不過演出時間就短咗啲，套戲就連唔多鍾意黑社會片嘅佢都好欣賞喎！
古巨基同李曾超群噚日到尖沙嘴為一間上海餐廳做剪綵嘉賓，基仔重同李太落手落腳炮製蟹粉獅子頭，當李太喺度攪豬肉嗰陣時，基仔就得戚話自己攪嘢最叻，但就即刻被李太寸佢：「攪攪攪，你唔好做攪屎棍，喺廚房唔好講埋呢啲嘢。」所以之後基仔被邀用手將豬肉搓勻時，就立即耍手擰頭，基仔呢次都真係大隻廣！
鄭佩佩前晚去大學出席研討會，原來早排何超儀喺澳洲結婚，鄭佩佩亦因個仔喺悉尼結婚而現身當地機場。問到原子鏸幾時同鄧健泓拉埋天窗，鄭佩佩話：「佢唔夠三十歲唔諗住結婚，不過如果佢要嫁我都冇法。」鄭佩佩個個仔女都事業愛情順利，做父母重有乜要求先得㗎？
