拜仁慕尼黑嘅德國中場戴斯拿真係慘，佢個右膝喺近兩年開咗五次刀，啱啱先至回復番水準，點知一波未平一波又起，二十三歲仔最近竟患埋抑鬱症。
戴斯拿係喺拜仁贏多蒙特四比一後發現自己唔妥，於是搵軍醫求助，經診斷後係患咗抑鬱症，今年內都唔可以再比賽。據講，由於拜仁同德國對佢抱好大期望，但佢擔心做唔嚟，幫唔到球會同國家攞好成績；加上佢女友好難先可以懷孕，好擔心BB唔可以喺明年一月順利出世。結果，壓力咪愈嚟愈大囉。
其實好多頂級球員都重創過，好似朗拿度同雲尼斯達羅咁，但𠵱家喺球場咪一樣咁勁。所謂「心病還須心藥醫」，如果戴斯拿解唔開自己個結，睇怕真係會玩完。
足智彩前日首次推出「讓球主客和」，里昂補時入十二碼，險勝到訪嘅斯特拉斯堡一比○，重搞到由「客隊勝」變咗第一日即開「和波」。我求大俠提醒大家，「讓球主客和」同「主客和」好唔同，買之前要搞清楚。如果大家重唔係好明，可以翻去今日AA4版咁就會一清二楚。
大家都想見到中國球員成功出國搵食，為華人增光，但係甲A球會瀋陽金德有關人士似乎唔係咁諗噃！事緣最近飛燕諾希望引入佢哋嘅年輕球員李春郁，不過瀋陽金德就竟然話要有正選至放人！我求大俠就覺得佢哋無非想賣個好價，但吓吓咁吊高嚟賣，中國球員想出國威威都幾難！
速龍今季好似唔識射波咁，得分屢創新低，每場平均得七十八分，淪為聯盟得分最弱嘅魚腩，認真羞家！噚日終於傳出速龍準備將安東尼奧戴維斯同艾雲威廉士，交換公牛嘅路斯同馬素爾，希望能增加得分能力，祝速龍反底成功喇！如果唔係今季肯定又要同季後賽講拜拜。
巴西球星李華度同AC米蘭關係愈搞愈僵，話說佢上周中代表巴西踢完世界盃外圍賽後，索性留響巴西多幾日，直到今日至返米蘭，一於自己放自己假，今日米蘭作客對基爾禾又唔使預佢。球會高層兼同鄉李安納度早排猛咁為李華度講好話，睇怕都係嘥口水居多囉！