特區政府喺董建華嘅領導之下，頻頻蝦碌；未搵齊人，問責制就強出台，結果係點？大家有眼睇，咪一個一個司長同局長瓜柴，日日新鮮。
咁有人就抱怨香港啲報章雜誌同埋電台電視，喺弱勢政府下不斷膨脹，甚至變成傳媒治港，最後搞到冇人肯入政府做問責官員，於是就更難翻生。
不過，八方就唔同意，呢個世界點會冇人想入政府做高官，有權又有勢，錢就不在話下，但係啲叻仔同大少爺就可能唔好搞佢哋。
至於唔使負責嘅政務官，就簡直大把人爭住做。八方聽聞，政府早前宣布重開招聘AO之門，增聘二十個政務主任之後，好多精英都入表申請。政府由舊年四月起，暫停請新嘅公僕，話要控制公僕人數增長喎，搞到班至醒嘅大學畢業生都冇出路。
港英年代，政務主任係天之驕子，一向地位超然。不過，一位新紮師兄同八方形容，佢哋一早已經接受咗最美好嘅日子已經過去嘅事實，𠵱家大家都只係望執支好籤，唔使跟位惹火嘅問責局長就還得神落。
傳真︰2623-9278
電郵︰