「陣間係咪有汽水飲？」旅遊巴前往位於沙田小瀝源的廠房時，幾個急不及待的小蘋果會員已經不約而同問着相同的問題。沒有發問的，臉上也難掩心中的興奮，大家在車廂中七嘴八舌搶着說，自己有幾鍾意飲汽水，一日要飲幾多支！不會掩飾做作的小朋友，擺明車馬對這次參觀可樂廠有很大的期望！
記者：月桂樹
攝影：光頭哥哥
甫下車，小朋友已被放在廠房大堂的Qoo公仔，及可樂樽形的汽水機所吸引。但更特別的是我們身處的廠房，原來是全世界最高的汽水廠！總共有18層樓。乜話？18層咋！有所不知的是這裏的樓底特別高，1層等於3層，小朋友即刻來個小心算，得出等於一般的樓高54層。哦！原來係咁。
之後我們正式進入廠房的心臟地帶──生產線。一部部大機正不停轉動，小朋友看着成排的汽水如何在輸送帶上排住隊封蓋、貼上招紙等，大家都望到眼定定。可惜有關方面話生產線唔畀影相，讀者惟有自己想像吓！而一眾小蘋果會員就分別參觀了膠裝、玻璃樽裝及罐裝的生產線。其中的注罐機，1小時最多可入成12萬罐可樂，真犀利！汽水咁受小朋友同大朋友歡迎，一般生產後3-5日就出廠喇。
汽水廠一日生產咁多汽水，所以都會諗吓計點樣可以環保啲。製造商除不停地在樽身和蓋掩的設計上做到更環保外，還於廠房內設了一個環保閣，讓參觀者也學習環保意識。佢哋更在上月舉辦了環保創意校際比賽，讓中、小學生發揮創意，利用飲品包裝物料製作家庭用品或裝飾品。
可口可樂由一名美國藥劑師，早在1886年創製。連售賣點都在藥房！當時每杯可樂為5美仙。而本來藥用的可樂，在偶然的機會下於糖漿加入碳酸水，於是便產生了我們的汽水可樂。可樂幾時進駐香港？答案就是1928年。
呢部係30年前嘅迷你可樂雪櫃，在當時來說，是全世界最細的雪櫃。
淨係睇樣真係唔知佢係乜！原來係阿爺年代、生於1950年的四腳式汽水機。點解會叫四腳式？因為機身有四隻腳，底部可安放一托盤，是給當時的人回樽時用。另外，你又知唔知當時一支汽水賣幾錢？5仙咋！
1985年挑戰者號升空，都有帶埋罐可樂。我哋身邊呢一罐，就係太空可樂嘅仿製品
各位小朋友見唔見我哋個個豎起1隻手指？因為呢支係1977年出產嘅第1支1公升樽裝可樂，重係真版，裏面有可樂㗎！
呢款係另一部古老汽水機，大家見唔見到側邊有一個個裝汽水嘅窿窿呢？
