秋風起，香港人就興食臘味，日本人又興乜？其實柴娃娃一齊玩嘅話，港日都一樣，離不開BBQ同打邊爐！
咁兩隊呢排日本至紅嘅少男組合w-inds同FLAME，都忙裏偷閒坐埋大擦一餐，而w-inds更搵埋老友鬼鬼嘅齊藤慶太同祥太兩兄弟開餐，食火鍋為名，講媾女經為實！
先講吓FLAME先，睇佢哋燒嘢食完全可以知道平時邊個最懶，比較紅嘅伊崎兩兄弟就搏命燒，而金子恭平同北村悠就淨係識得食，差啲重要伊崎兄弟餵埋佢哋食殘廢餐，其中有段時間人人去晒玩，但伊崎右典驚啲火俾風吹熄，所以佢一個人守住，而佢辛苦炒好嘅麵北村唔該都冇聲就食晒！
不過佢哋咁好感情都唔計較嘅，佢哋重透露其實收入好微薄，每餐都係食最平嘅定食，今次免費食到咁多肉，已經好滿足喎！有冇咁慘呀？
至於w-inds同齊藤兄弟食嘢時，都異口同聲話同大過自己嘅女仔拍拖最好，可以倒轉被人哋照顧，真係有潛質做軟飯王喎！
而且佢哋個個最留意女仔隻手，如睇吓有冇修甲咁啦，其中橘慶太同齊藤慶太又大讚矢田亞希子超可愛，迷死人，唔知啲年輕女fans知道後會唔會好激氣呢？