前日本報報道張文慈與中年猛人出雙入對，據悉一個月前兩人在朋友介紹下認識。
昨日記者向張文慈求證，身在澳門的她接受電話訪問說：「佢唔係圈中人，所以我唔想公開有關佢嘅嘢，我同佢識咗一個月左右，唱過幾次卡拉OK，𠵱家雙方都係互相了解緊，我覺得佢幾有紳士風度，但同佢未發展到拖友關係，將來嘅事就將來至算。」
對於有消息指張文慈追求者眾，昨日她笑說：「邊度有好多追求者呀！出面有好多人話我拍拖之後富貴咗，根本冇咁嘅事，𠵱家揸緊部車都用咗三年，我租呢間屋前都未識佢，其實我都冇富貴過，我根本唔係渴求過少奶生活嗰種人，我只希望搵到真正對我好嘅男人就心滿意足。」
此外，繆非臨昨日到銅鑼灣出席麵店開幕時，提到張文慈有新男友，她說：「我都唔係八卦嘅人，冇問佢喎，就算係佢拍拖都好正常啫。」
採訪：陳月媚