老實說，Chilam的外形及條件都不俗，以他的條件上位不難，但觀其入行超過十年，事業成就總是差了一點點。
Chilam多年前為無綫拍攝劇集《天地男兒》，一度人氣急升，但他沒有把握好機會，到了現在的《西關大少》，情況又如何？Chilam滿有信心地說：「應該把握得到！喺電視上我曾經有好作品出現，當時我有諗過點樣可以延續個勢，但呢樣嘢係要用經驗去配合，自己把握得唔好，以前好幸運、輕易得到手，亦都好輕易咁放過咗，但隨住人生經歷同成長，𠵱家自己會去把握，珍惜每個機會，唔會再咁輕易畀佢走。」
簽約澤東會否就是他事業上的一個轉捩點？Chilam說：「兩年前佢哋已經搵我，不過因為一啲問題合作唔成，今年時機巧合，我好希望喺電影方面能夠遇到好角色，有我嘅代表作，歌曲同電視角色都有，遺憾以往拍過唔少電影，冇一部代表作出現，所以我要求一個好嘅電影製作單位，對我嚟講係最大目標。」
Chilam續說：「我想合作嘅導演唔只係王家衞一個，每個導演身上都可以學到好多唔同嘅嘢，令我有所得益，𠵱家只不過係一個開始，希望做自己想做嘅嘢。」
王家衞能否達成他的心願呢？Chilam說：「大家都好忙，需要時間去認識大家，佢係一個慢工出細貨嘅人，但要度身訂做一個角色畀我，應該冇可能。」
年屆三十二歲的Chilam形容目前才是他的黃金期，他說：「我自覺長大咗好多，但𠵱家先係我嘅黃金期，我個樣睇落去唔算大，但又有啲人生經驗，可以扮年輕人角色，做大少又得，都好着數。」