上星期四有朋友突然打電話畀伏勝，問知唔知呢排有冇人幫保華德祥（498）出報告，又或者有冇做過「吹風會」之類，伏勝覺得好奇怪，呢個朋友好日都唔蒲頭，突然來電一定有事，而且呢隻股票差不多已經被股民遺忘，無端端又會有人想要佢嘅報告。於是嗱嗱聲問個朋友發生乜事，原來佢話有行家個客想喺個市重係「火紅火綠」嘅時候買殼上市，所以幫佢攞定料方便做嘢。
真係咁啱定係咁蹺，上禮拜五下晝就有個千五萬股6毫子造價嘅轉倉盤上板，隻股跟住被炒起。伏勝下意識認為隻股仔好可能會有動作跟尾，如果伏勝無估錯，隻股仔短期內應該重有料到。
上個禮拜上市嘅修身堂（8200）認真威水，最高曾經見過九毫一，以上市價兩毫半計，升足兩倍六有多。雖然之後連續兩日回軟，上周五跌番落六毫二收市，但攞到貨嘅仍然勁賺倍半，唔怪得呢排唔少散戶對新股咁醉生夢死。另一隻新股華潤電力（836）就冇乜睇頭，上個禮拜五收市價仍然係招股價2.8元，不過有個做企業財務嘅朋友講，隻股係正嘢嚟，皆因佢哋上市前原本有兩間質素勁正嘅電廠，因為趕唔切而冇注入上市公司內，不過佢哋啱啱攞到批文，話可以用優惠價嚟注入公司裏面。據講，如果將該兩個電廠成功注入上市公司，個PE會由𠵱家預期嘅6倍跌到去4倍唔夠，到時班芬佬見到有咁標青嘅「靚股」，點會咁唔俾佢吸引。
伏勝