精明消費：韓國直擊
LG全能式智能家居

有無諗過唔使請菲傭，返到屋企已經有「人」洗好衫、煮好飯、吸乾淨地板？韓國LG家電最近研製嘅「全能式智能家居」網絡系統，用家可透過手機或電視遙控器，遙控家中電器運作，呢套網絡系統預計喺2004年先正式登陸本港，講多無謂，一於飛身到南韓先睹為快，齊齊大開眼界喇。

記者：何善華　攝影：陳盛臣

智能家居符合現實需要
韓國LG家電設計師Anna表示，「全能式智能家居」概念絕對符合現實需要，公司做過詳細嘅市場調查，然後將搜集得嚟嘅資料「概念具體化」，設計構思根據調查結果而面世，但目的不外乎一個，將人類生活簡單化，以方便大眾為大前提。

一站式智能家居由雪櫃話事
網絡雪櫃GD-D267DTU
估計售價：約$40,000
（一套連網絡洗衣機及微波爐需約$100,000）
呢部重量級大型雪櫃就係「智能家居」大阿哥，管理家居內所有家電操控，再由雪櫃指令其他家電產品（暫時只有洗衣機與微波爐）去完成主人任務。雪櫃置15.1吋顯示屏，顯示雪櫃內所有食物嘅新鮮度及有效日期，任何一件食物過期或發臭，會第一時間作出提示；同時備有上網、音響、拍照、備忘錄、日誌等多元化功能，一站式搞掂屋企家頭細務，各位煮飯婆小心無碇企呀。

TrommWD-3201FD
直驅式網絡洗衣機
售價：$6,990（類似型號本港有售）
類似型號剛於上月抵港，每分鐘旋轉速度達1400次，可洗窗簾、床單等大件紡織品，7公斤大型洗衣量，係目前為止本港洗衣量最大嘅家用洗衣機，但本港出售型號暫無USB插頭。

睇埋其他LG前衞家電
智能雪櫃Tzar340
估計售價：約$18,000
呢部雪櫃雖然無網絡雪櫃咁多元化，但本身亦有好多功能，適合中型家居使用，被形容為「智DoorCool系列」的智能雪櫃獨有三面製冷系統，分別來自雪櫃後側、左側及雪櫃門，使食物比平時的保鮮時間延長1.5倍，符合環保概念。

Tromm前置式洗衣機
估計售價：約$3,700
洗衣機沿用前置式設計，方便易用，機身纖細輕巧，只得34厘米闊度，3.5公斤洗衣量，能減少衣物摺痕出現，操作時震動少，比傳統洗衣機靜。

CYKINGsport電子吸塵機V-C7779CEU
估計售價：約$2,400
有無試過用吸塵機嗰陣，有啲死角位永遠吸唔到？𠵱家有個識得能屈能伸嘅好幫手，遇有死角位吸盤就會自動縮埋一嚿，目的都係方便大家啫！

MD-272ES多士微波爐
估計售價：約$1,460
將多士爐和微波爐二合為一，第一個反應係：「好慳位呀！」530W耗電量，省電環保，兼容10項功能，包括自動烹調、解凍、自動加熱等。

ARTCOOLMIRROR冷氣機LS-C060FB
估計售價：約$5,150
走優雅時尚的ARTCOOLMIRROR，點睇都似一幅畫多過係一部冷氣機，板面為數碼顯示屏（VFD）設計，圖畫亦可隨閣下喜愛而更換，為平凡家居增添現代感。

MD-1243KC咖啡微波爐
估計售價：約$1,500
另一部嶄新推出的光學微波爐，竟然可以有埋煮咖啡功能，認真好嘢，1200W耗電量，1.2公升存食物容量，朝早起身重唔第一時間跑去拎多士同埋熱咖啡。

PL-100金色電飯煲
估計售價：約$1,400
外形甚為Cyber嘅電飯煲，大大粒按鍵喺韓國好流行，電飯煲同時備有多種烹調功能，除煲飯外，亦可以煲粥、湯和蒸蛋等，適合較多家庭成員的家居使用。

售賣點：LG電子家電
地址：銅鑼灣希慎道33號利園33樓3301室
查詢電話：29095100