莫文蔚昨日在銅鑼灣出席「香港同志電影節2003」記者會，她表示自己在台灣的網頁，很受女同志歡迎。
莫文蔚談到選擇朋友的標準，她說：「做朋友唔係睇佢嘅性取向，我都有男同性戀朋友。」問莫文蔚可試過給女同性戀者追求，她說：「我以前讀女校都唔覺學校好多女同性戀者，我都係仰慕大姐姐，當佢哋係學習榜樣。」
再問到莫文蔚可試過被人博懵，她說：「男嘅做係理所當然，女嘅就冇試過，佢哋最多係同我講鍾意我啲歌同睇我嘅戲。」
莫文蔚又表示昨晚會出席何超儀的婚宴，她說：「將來結婚都唔恨搞到咁大型，做騷都得到樂趣，我唔想結婚都做畀人睇。」提到結婚大計，她說：「總之兩個人關係好，結唔結婚都冇問題。」莫文蔚自言男朋友未有向她求過婚，暫時她以工作為重，不考慮結婚。
採訪、攝影：李珮洳