美國HBO電視台劇集《色慾都市》，將會喺下年初播映第六輯嘅完結篇，而最近就有美國網頁爆料，話由甘卡拉圖（KimCattrall）飾演嘅蕩女Samantha，喺最後一輯入面會患上乳癌，佢除咗可能要割咗個乳房之外，重會甩晒啲頭髮！估唔到Samantha一世風流，最後會落得如此收場！
喺劇集入面將男人玩弄於股掌之上嘅Samantha，一向係無性不歡嘅淫娃，雖然佢搭上酒店大亨Richard後一度修心養性，不過姣婆始終守唔到寡，唔知佢係咪玩得太多，喺第六輯開始，Samantha已經發現身體唔多妥，下體嘅陰毛開始變白，最後佢重將所有陰毛染成鮮紅色，嚇死老友Carrie！
Samantha其後驗出患上乳癌，要做手術同接受化療，佢知道呢個消息之後當然晴天霹靂啦，當Samantha同男友交歡，重慘到俾對方扯甩成撮頭髮，認真陰功！變成禿頭嘅Samantha，最終要以假髮示人，佢亦真真正正收斂自己嘅性生活，不過據聞編劇唔想搞到套劇咁慘，臨尾會交代四個女主角遇上真命天子拉埋天窗，總算係大團圓結局！