滙豐（005）土耳其總部被炸，但全球金融市場受影響比預期輕，美股周四晚跌得唔多，港股噚日雖一度跌破11700，但好快就收復失地，恒指收報11839，跌5點，成交127.4億元。
在土耳其被炸主角之一滙豐，股價微跌0.43%，收報115.50元。雖然如此，伊拉克又遭到炸彈襲擊，如果恐怖襲擊浪潮不斷擴大及蔓延，都咪話唔恐怖，投資者相信會轉為觀望局勢發展，好難再寄望大戶入市大舉炒股。
物美（8277）首日掛牌，升至8.25元後沽壓大增，一度回至6.80元，收報7.05元，仍較招股價高13%，表現都算理想，而聯華超市（980）就再跌2%，收報7.15元，但仍較招股價3.875元高84.5%。如果物美股價企唔穩，位高勢危嘅聯華超市，可能會插得更勁。
中石化（386）噚日表現差過滙豐，股價一度急挫6.6%，低見2.125元，收報2.20元，仍跌3.3%。原來市場傳兩大策略性股東英國石油及埃克森美孚可能會減持。中石化招股價為1.59元，以噚日收市價計，升幅僅38.36%，對短線投資者而言都幾可觀，但對策略性投資者而言，只是微不足道，除非兩大策略性股東等錢使，又或者唔再重視彼此合作關係，否則甚少會為咗30-40%回報而出貨。不過，兩大策略性股東一旦出貨，跌幅肯定唔止6.6%咁少。
噚日市傳嘉禾（1132）用數十億元台幣入股華納威秀發展的台灣戲院業務，消息可信性唔知有幾高，不過嘉禾市值唔夠2.4億元，阿虎都好想睇吓佢點樣蛇吞象。
阿 虎