雖然噚日大市只係跌咗5大點，但好多股份都從高位回落，不過亦有幾隻炒股逆市上升。
經紀陳話，據講有幾隻股票，為求成功批股，故此不惜工本力頂。
其中一隻就係傳聞多時的品質國際（243），前日臨近收市時，股價突然大幅下挫，跌穿3元收市。噚日朝仍然有多少沽壓，最低見過2.85元，但在有心人力撐之下，最後收3.10元，倒升4.2%，成交股數有成11球，成交金額都有3372萬元，睇嚟炒家真係花咗唔少彈藥。
江湖傳聞，品質有意以每股3元配股集資，所以無論如何要將股價守喺呢個水平之上。
另外，久未見有大型炒作活動的殼王系股份，其中一員保華德祥（498），噚日突然出現一手為數15球，每股0.60元的大手成交上板，惹來炒家無限揣測，以為有料到。
不過，經紀陳堅稱冇事發生，據講只係有些人士要咗手貨炒作，當佢哋散完之後，股價就會回復平靜。
保華德祥噚日升10%，收0.65元。
慕容小初