電訊盈科嘅薄扶林豪宅貝沙灣，賣到全城矚目，人盡皆知，項目中嘅大型綜合零售物業數碼中心，啱啱攞咗香港工程師學會結構分部，同英國結構工程師學會香港分部，頒嘅「卓越結構大獎」，呢項由茂盛結構顧問設計嘅數碼中心，最大特色係用透光纖維材料做出放射形半透明圓頂，日間可以充份利用天然光，節約能源；晚間用特設燈光照明，又是另一番景致。物業用玻璃外牆，外面嘅優美海景一覽無遺。
至於置地嘅中環遮打大廈，設計公司奧雅納（香港），採用活動保護幕、滑升升降機、攀爬模板系統，同逆建築施工法，令工程未完成就可以做內部裝修，所以攞到「卓越結構嘉許獎」。
另外，房委會設計嘅秀茂坪購物中心，用玻璃外牆擴闊空間感，螺旋形樓梯令建築物具層次感，同獲「卓越結構嘉許獎」。
「從前有一個夢幻城堡…皇帝召集了全體內閣大臣，並委派…」，唔好以為蘭西想同大家講童話故事，其實呢個係太古地產鰂魚涌太古城中心聖誕活動嘅第一擊，商場以「經典童話故事由太古城中心開始」做主題。
太古地產董事及總經理詩柏將會變身為宮廷大臣長，高級經理郝唐惠莉就扮冬令女公爵，而太古廣州代表處首席代表郝繼霖會飾演幻法公爵，三人重會着住由人手縫製嘅靚衫粉墨登場，以舞台劇形式主持開幕禮。聽講啲衫重可以着燈。而舞台會有真雪飄落嚟，係香港第一個商場咁做。
太古地產嘅邀請函話出席者要穿着華麗舞衣，如果有問題可以搵陳美嫻仙子喎！今個聖誕節，唔少商場都會大搞活動，吸引消費者，零售市道應該會好熱鬧。
中原地產噚日宣布，會接受買家用人民幣落定同畀佣金，重不設上限。
為咗盡量避免收到偽鈔，中原陳永傑話遲啲會安排行政部嘅同事北上，向中原（中國）嘅同事學習辨別偽鈔嘅知識，重會買防偽鈔機，擺喺新界北區嘅分行，事關嗰區一向都有唔少中港商人買樓，可以收人民幣，就方便好多。
中原重做咗個調查，發現原來𠵱家嘅放盤業主，都唔係好放心收人民幣，三百三十個被訪者中，超過八成未必會收人民幣，主要都係擔心滙率同偽鈔等問題。
元朗南生圍山貝河突然多咗條鱷魚，要勞煩澳洲嘅鱷魚先生日夜出動去捉鱷。一時間，鱷魚忽然「人氣」急升，連發展商賣樓都搵鱷魚做宣傳。
長實同新地嘅長沙灣宇晴軒，就捕捉呢個鱷魚熱潮，今日同聽日，喺尖沙嘴售樓處派玩具鱷魚畀睇樓人士。條玩具鱷魚得唔得意，就見仁見智，但就勝在有潮流觸覺，大人細路都啱。
發展商重準備咗啲文字資料，向睇樓市民講解吓鱷魚嘅特性，等市民對鱷魚有多啲認識。
好彩唔係證券行送鱷魚，唔係啲小股民就真係要講句大吉利是嘞。
將來一定會成為旺角區地標嘅朗豪坊，其中人流最旺嘅商場部份，鷹君就專登請美國捷得國際建築師事務所幫佢設計。呢家設計公司喺美國、夏威夷同日本都有唔同嘅作品。
聽捷得高級副總裁BrianHonda講，由於旺角有自己獨有嘅特色，所以設計意念要做得比較「街坊啲」。
中庭頂部個天幕，意念原來嚟自美國拉斯維加斯舊城個燈泡天幕。拉斯維加斯同旺角都係屬於不夜天嘅地方，朗豪坊喺嗰度攞靈感，睇嚟都冇選錯對象。
蘭西
電郵地址：
