《壹週刊》揭曉讀者至愛品牌，睇過名單，發覺大部份與自己無緣。汽車一項，別人鍾意寶馬，我鍾意Vespa綿羊仔。比汽車大一點的，別人揀七人車，我寧願要火車。化妝護膚品SK-II勝出，我最怕看它的電視姣樣廣告，更承受不了化妝小姐硬銷，慣常只會到有機藥房揀雜嘜牌子。時裝名牌，LV人人愛，包括城中姓劉的闊佬。但我腸胃曳，對奶粉袋「敏感」，又唔係闊太，她們心郁的國產羅湖城老翻LV，我覺得紙皮袋比它靚，梗係唔吼。手錶中讀者最愛是Rolex，我已經好耐冇戴手錶，冇發言權。珠寶首選Tiffany，我喜歡柯德利夏萍，對偶像還是保持一點超現實距離好，所以未入過T字名店，未試過BreakfastatTiffany。非酒精飲品由可口可樂奪獎。我比較願意投酒精飲品一票，非酒精屬非我族類，不喝白不喝，懶得理。最後金獎：諾基亞成為全年至愛手機，這個我倒是用家。01年入貨，用的型號，今天升為「古董」級。今年暑假去寮國旅遊，兩個當地導遊都用我這個型號，一下子，自我感覺相當「第三世界」地良好，以後也不想換機了。
數自己至愛的品牌，一隻手用不盡。我這種另類消費者肯定對振興經濟無助益，多個我，就多個品牌倒米。對名牌疫潮無動於衷，可能有病，我已經自行實施自我隔離兼亮起綠色警報。綠色令我想起Hulk，在漫畫前輩中，這個綠色巨怪不算名牌。