恐怖分子搞搞震，今次炸散滙豐（005）土耳其總部大樓，睇《蘋果》昨日頭版大相，真係驚心又傷心。
不過，金融市場出奇冷靜，亞太區股市是日冇散到，個別重反跌為升。港股表現亦唔差，大笨象最多跌過兩蚊，收市只挫5毫，其餘藍籌多能企穩，恒指收場只係微跌5點。
壞消息而跌唔落，可能代表個市見底，或者至少有短線反彈。有冒險精神者，不妨小注買藍籌Call輪，值博率唔低。
和黃（013）大弱勢，但9RSI周三低見22.6後，呢兩日股價喘定，似組織反彈。和黃是日平收55.25元，隻Call輪9914收33仙，微跌1格，明年1月26日到期，溢價5.5%，槓桿率16.7%，正股短期內反彈兩蚊（上番10日線水平），隻輪有權升3成。
長實（001）亦有回穩之勢，昨收58.25元，升1格。揀長實Call輪博反彈，9065可以考慮，現價36.5仙，明年3月1日到期，溢價9.3%，槓桿率近16倍，行使價60元，頗有機會由價外變價內。
中移動（941）昨日表現唔錯，升逾1%，收21.65元，9RSI出現利好嘅底背馳，有機會再彈高啲。博中移動Call輪，可揀9116，溢價11.6%，槓桿率12.1倍，明年4月到期。
記住𠵱家市況風高浪急，玩輪只合小注怡情，賺蝕都要快走。
章 盛