王菲最近去台灣宣傳新唱片，又打桌球又打排球，好鬼活躍，佢前晚重上咗電視台做陶瓷㖭！主持之一唐志中起初用「小菲」嚟稱呼王菲，嚇到王菲話：「不會吧！」但唐志中話：「反正我們跟你男朋友年齡差不多！」好彩另一主持陳建州（黑人）打圓場：「你真下流！」重作狀打佢一巴，𠱁到王菲好鬼開心。
而王菲玩陶瓷同彩繪時好專注，重笑得好鬼開心，陶瓷導師話由阿菲所做嘅作品，可以睇到佢份人擇善固執、凡事唔強求。王菲之後又同黑人、兩位籃球健將打籃球，個個男人都入唔到波，反而打籃球唔叻嘅王菲有進帳。
另外，謝霆鋒噚日同王傑、Twins去北京做騷，日前有傳霆鋒復牌後又撞車，噚日佢好晦氣咁話：「如果係嘅話，你今日筒菲林曬出嚟就見唔到我。」即係話如果真係撞車，佢已經死咗變鬼喎！而霆鋒嘅繼父、即係狄波拉老公江耀城嘅二十九歲細女，今日喺新加坡出嫁，但霆鋒去唔到，據講出席嘅圈中人有謝賢同息影多年嘅嘉玲。
李嘉欣同吳彥祖主演嘅《Miss杜十娘》，有場戲講述吳彥祖抵受唔住貧窮，就將嘉欣賣咗畀人，萬念俱灰嘅嘉欣最後喺吳彥祖面前揭露自己擁有百寶箱嘅秘密，重將寶物一件一件咁丟棄，最後重投江自盡。不過嘉欣就話喺現實中，絕對唔會為愛情而犧牲財物。不過我馮仁昭都覺得，為咗個負心漢犧性咁多，真係唔值得！
陳伶俐、楊婉儀、劉錦玲同一班醫生噚日喺尖沙嘴出席「愛心遍浸院」活動。陳伶俐即席幫醫生量血壓，點知佢雞手鴨腳，係咁狂揼個血壓機，搞到個醫生隻手麻痹，最後重手震嗌停。陳伶俐話唔好意思，因佢個心一早飛咗去喺紅館綵排嘅老公林敏驄嗰度喎！咁都扯到去佢老公個騷，真係識宣傳！
呂良偉老婆楊小娟近日發起搞義賣二手衫，活動會喺今個月二十八同二十九號喺北角城市花園酒店舉行，重搵咗張玉珊、黎姿同傅明憲等捐衫，佢話劉嘉玲同羅麗莎都應承咗捐衫，籌到嘅錢會捐畀貴州嘅學校起校舍。楊小娟話自己都捐咗幾十件衫，原價都要成五十萬，𠵱家標價就低至三折。而任賢齊都捐咗三件衫，重以五百蚊低價做暗盤拍賣，價高者得。
無綫早前有內部指引，要求員工準時簽簿返工，引起部份製作部員工不滿，重傳真去報館投訴，聽聞𠵱家重會搞簽名行動，要求取消呢個措施。噚日何定鈞喺將軍澳話：「唔係咁呀！自己同事，使乜搵第三者呀，公司每月都有當值助理經理，可以搵佢哋傾。」問何定鈞𠵱家重係唔係硬性規定返工時間，佢話：「一切都停晒啦，𠵱家冇人要簽到。」佢重話唔會秋後算帳，馮仁昭都希望係咁啦！
鍾淑慧同老公吳岱融今晚原本要去深圳一間酒吧登台，點知有消息話間酒吧個老闆走咗佬，所以登台臨時取消。問到鍾淑慧有冇損失，佢噚日喺電話裏面話：「我都收咗少少定，係都係損失咗個期，我會用嗰啲時間同阿仔溫習。」難得有時間同個仔享家庭樂都係好事！
