中大慶祝四十周年校慶，噚晚進入高潮，喺校內上演話劇《中大人家》，好多校友捧場，幾位前任校長都有到，除首任校長李卓敏已仙遊外，第二任校長馬臨、第三任校長高錕同現任校長（即第五任）金耀基都有到，睇嚟睇去重爭一個，就係第四任校長、跳槽做咗教統局局長嘅李國章冇到。
話劇都有提到李局長，話佢因為太忙去唔到，但八方心諗，前兩日李國章去城大，俾學生勁噓，重差啲走唔到，所以對李局長嚟講，𠵱家最危險嘅地方莫過於大學，點會自投羅網？相比之下，噚日有到場嘅三位校長同前校長就輕鬆得多，七十九歲嘅馬臨話自己得閒就游水、散步，高錕忽然鍾情學陶瓷，至於金耀基，當然係等緊退休啦。
（圖左起）馬臨、金耀基同高錕三位校長都有捧《中大人家》場，偏偏唔見李局長。
傳真︰2623-9278
電郵︰