原定要11月尾先推出嘅《MarioParty5》，居然比美版搶先成個禮拜推出。第5集仍然由一眾瑪利奧主角擔大旗，而且更加入3個新角色Toad、Boo同KoopaKid，開Party就更加熱鬧。新作加上更多動作遊戲元素，可以玩到多達70隻Mini-Games，《MarioParty》嘅Fans絕對唔能夠錯過，唔好講咁多，即刻搵埋瑪利奧嚟開Party吧！
記者：許福合
遊戲類型：Puzzle
對應機種：GAMECUBE
開發商：任天堂
遊戲人數：1至4人
售價：$370
新一集《MarioParty5》玩法同上集差唔多，以爭奪最多星星同金幣為目標，睇睇邊個最後會成為Party之王！而要讓玩家分出高下，就要靠每一Round之後嘅Mini-Games，不過咪話小記睇死你，即使你係打機高手，要喺Mini-Games勝出，都係乖乖睇清楚指示點玩，否則只有捱打嘅一份。
Mini-Games數量多達70種以上，玩法各有不同，有考眼光、反應，亦有鬥連射速度。其中一個接雪糕遊戲，愈接得多行得愈慢，玩法過癮畫面又靚。而喺Mini-Games模式內，更可以玩番開過嘅Game仔，最啱用嚟鍛煉身手。
今集《MarioParty5》畫面比上集更出色，亦使用更多3D效果，地圖變化款色多多，某些地圖甚至分為3個部份，要靠坐火箭先過到對面。有時會發覺4個角色會分布喺唔同地方，1個人玩要等3個電腦角色，會出現唔少冷場，所以熱鬧啲搵齊4隻腳就好玩得多！始終《MarioParty》嘅精髓放喺多人模式中，尤其最後五局，會出現更多陷阱同事件，人多啲就更緊張刺激。重要提你記住攞Capsules，除咗可以行快幾步，更有機會同另一個玩家調換金幣數量，隨時可由富翁變窮光蛋，亦有一鋪翻身機會。
《MarioParty5》重有個SuperDuel模式，揸住個炮彈車互轟，車上零件包括炮台、引擎都可更換，不過代價唔係錢，而係從其他模式得來嘅分數。呢架戰車更可以抄落記憶卡同朋友對戰，玩法多多。
好動嘅玩家，更推薦你玩埋Bonus模式內嘅沙灘排球，標準2對2，最特別係玩嘅波好搞鬼，唔同類型有唔同效果。如倒數爆炸，最正係骰仔波，要睇邊面落地先知有幾多分，好似擲骰咁好講運氣，落後幾多都可以隨時追番，另外重有個冰球都值得一試。
喺SuperDuel模式內，有幾件零件或人物要經過指定條件先可以用到，以下就係幾個提示，供各位參考。
售賣點：DreamStore
地址：灣仔東方188商場256號舖
查詢電話：25753285
