賓架L退休之後，平時生活甚為清閒，得閒到可以朝頭早睇有線電視直播立法會民政事務委員會質詢何志平、胡紅玉等人。佢對一位人事資源專家嘅發言好有意見，暫且不表，佢心水清，見到電視鏡頭捕捉到蔡素玉忙裏偷閒，抽空「篤機」，篤乜嘢呢？賓架L話：「蔡議員用嘅機同我嗰部一模一樣，咪就係股票報價機囉。」咁都俾佢睇到，服晒。
賓架L退休，生活豐裕，有本事也。賓架L位老友鬼佬R上星期日趕去聽RollingStones，唔敢揸車（怕冇車位），從山頂住所坐的士落添馬艦，司機就係開緊錄音機，聽「滾石」名曲《Satisfaction》，鬼佬R於是問佢點解咁有興趣，一談之下，發覺呢位中年司機嘅英文講得非常好，好過佢啲夥計㖭，怪而問之：「的士司機英文好少咁流利嘅噃？你以前做邊行呀？」司機沉默咗一分鐘先至答：「我本來係賓架，前年銀行裁員，出咗嚟，惟有轉行，搵番兩餐。」
鬼佬R之後對賓架L講：「好彩你年紀老一啲，可以及時退休，年輕十年嘅話，可能要做的士司機！」彼此彼此，鬼佬R如果唔係及早自銀行轉工，做其小老闆，亦可能早已下旗歸國。大家入行之時，銀行工係鐵飯碗，啲師傅上司唔知幾妥當，勢估唔到，輪到自己開始有資格揸弗之時，竟然碰上董特首當權嘅百年一遇情況，點可以唔認命。