西九龍文娛藝術區工程，又搞到政治化。以矮仔陳為首嘅地產商，公然辱罵政務司司長曾蔭權，成為中環香港會所嘅鬼佬同高等華人呢幾日午餐嘅談論資料。人人都話，喺殖民地時代，堂堂布政司霍德，點有可能畀到你班猜娜民咁嘅羞辱，一早就釘死你班友仔。今時今日，董班子權威掃地，點止俾長毛佢哋恰，重連地產商都當董班子係奴婢，你講一句，佢覆番十句，你話呢個動亂之城點樣管？
煲呔嘅處境，就特別艱苦。佢已經飽受阿董及土共幫嘅歧視及仇恨，明知煲呔民望高，沙士時期，派佢去揸掃把。
煲呔投閒置散，喺白加道官邸日日欣賞白雲蒼狗嘅風景，日日睇見幅西九龍爛地，頂心杉咁頂實對眼，六百萬市民都寄望今次煲呔盡地一煲，橫掂都俾阿董同土共插到個背脊花，就算死都要轟轟烈烈，單一承包，有乜唔妥？做到嘢咪得囉？唔通好似阿董施政報告話要建嗰兩個新界無煙市鎮咁，今時今日，都重係一陣煙都冇？
由政府去做文娛，已經有辦睇，例如尖沙嘴文化中心，起到一個超級大山墳加一座巨無霸公廁，鬼咁有深圳feel。交畀私人發展商，起碼由市場主導，唔會俾政府搞到老老土土。
煲呔奮戰西九龍，肉搏地產商，唔使問又係孤軍作戰，阿董、何志平、唐唐，冇個幫口幫拖，連土共喉舌都好閃縮，或者係未知上頭意思點。呢啲咁嘅「團隊精神」，自從葉劉領教過而焗住要淚灑官場，到今日已經見怪不怪。總之跟阿董，就係絕路一條。
其實，呢個世界峯迴路轉，唔好咁睇死煲呔。三年幾流流長，第三任頭目人選：唐唐已經見多少謝謝哋，李國章太過有個人性格，喺中國嘅政治文化，天地不容；域陀．馮只不過係另一個老懵董，如果委任「梁振中」，分分鐘會有百萬人大遊行，連陳太都暗中再發功。消息人士話，胡溫𢱑到頭都爛，都唔知搵邊個頂阿董，煲呔未必會俾阿董同土共誅得死。
傳真︰2623-9278
電郵︰