巴西同阿根廷噚日朝先後打和烏拉圭同哥倫比亞，相信唔止上盤客一殼眼淚，連買呢兩隊波單W嘅都呆晒……呢兩隊波失分其實係有啲互動玄機。
呢一輪嘅賽前阿根廷領導群雄，同第二位巴西同分，結果巴西和波，阿根廷作客打和哥倫比亞仍然有着數，所以踢起嚟冇咁積極；即係話：頭場巴西贏唔到，尾場阿根廷開下盤機高。
或者會問：點解巴西超班都贏唔到烏拉圭係咪離譜？我求大俠認為巴西大部份國腳都喺歐洲搵食，兩場外圍賽已經搞到佢哋好疲，嚟緊啲聯賽同歐冠盃大戰連場，於領先下鬆懈咗俾烏拉圭有機可乘。同樣道理，阿根廷班球員亦掛住歐洲，巴西和波亦促使場波開下盤。你哋話呢啲係咪互動玄機？
威爾斯喺國家盃功虧一簣，前鋒比拿美好心噏，佢本來係國家隊首席前鋒，但因膝傷搞到喺呢啲關鍵賽事有得睇、冇得踢。佢就痛定思痛咁話，以前成日帶傷上陣為國家隊同紐記比賽，拖慢膝頭哥康復進展，亦影響表現，所以佢今次要百分百康復先至上陣，即係話有排唞！
斯洛文尼亞前晚多踢一人竟輸畀克羅地亞，我求大俠認為佢哋隊中最要反省嘅應該係隊長柏夫連。事關佢見克軍中堅杜陀兩黃一紅被逐，表現得不知幾咁開心，當正贏咗一樣。結果係點？咪輸波收場囉！呢個故事教訓佢，無時無刻都要打醒精神，咪以為打多一個就贏梗。
摩利士𠵱家被控強姦，照正英國佬咁保守同為免麻煩，應該暫時停佢賽，但列斯就冇咁做到，重話明佢可以繼續比賽。或者你會認為，列斯咁做係支持摩利士嘅表現，但我求大俠就覺得唔係咁，事關佢哋𠵱家班波五癆七傷，而且兵源又唔夠，咪焗住唔向佢作出紀律處分囉！
噚日76人冇咗艾華遜，重要作客響主場未輸過嘅速龍，莊家就睇死佢哋輸梗，開出速龍讓八分嘅盤口。但係，就低估咗76人上下一心嘅鬥志，今場佢哋就憑史奴、馬格積遜同麥基都射入今季自己個人得分新高下，破咗速龍主場不敗紀錄，開咗個下盤啦！