賓架陳來電告知：「上一期（十一月十三）《壹週刊》將《GG細語》某幾句貼堂，你威威啦。」即刻搵壹仔嚟睇吓，原來引用咗十一月八日本欄講《如何教仔女》一文內之《朱子治家格言》。當日其實有一句印錯字，原文應該係：「見富貴而生諂容者，最可恥」，《蘋果》誤印「諂容」為「諂空」，當然係錯嘅，但壹仔引用之時，梗係冇翻查「通勝」，冇修正到，於是亦係「諂空」，既然一錯再錯，為免誤導讀者，必須在此更正。諂音chim，即係奉承，假裝咁解，「諂笑」即係假裝笑臉，「諂侫」就係擦鞋，「遇富貴而生諂容者」便是見到富貴人家就滿臉笑容，連老竇都唔記得姓乜咁嘅款。「諂空」就唔知點解咯。
退休老師Y女士睇完《如何教仔女》，就諗起自己有兩個靚女（真係好靚），連忙向佢哋講解收男仔男人禮物之道，誠恐靚千金他日一時不察，收受公子哥兒嘅厚禮，授人話柄也。今時今日，桃色新聞無日無之，為人父母確係膽戰心驚，譬如今個星期一出版嘅《快週刊》封面大字標題：「淫亂議員……」有乜辦法唔嚇驚人！
Y女士亦有睇「通勝」版嘅《朱子治家格言》，佢話古時都講：「婢美妾嬌，非閨房之福（現代繙譯：美貌菲傭嬌豔外遇，搞亂家庭）；童僕勿用俊美（後生隨從唔用英俊美男，防搞基也），妻妾切忌豔妝。」啲議員如果有讀《朱子治家格言》，就知道唔好與身邊之人搞搞震，否則冇乜好下場。讀古文，須有現代詮譯，否則「格言」屢屢言及妻妾，你又搞三妻四妾，就會自我毀滅咯。