美股升，日股漲，港股冇跟到，唔多對辦。早段高開，唔少藍籌Call輪升勢曇花一玩，隨即冇跟正股走，已經係不良訊號。暫時最好按兵不動，等多一陣，睇吓外圍點變。
新世界發展（017）稍為硬淨，收4.575元，有兩格進帳。好耐冇新世界Call輪掛牌，卒之本周一起有1件9297登場，昨收35仙，升11%，啱啱打入龍虎榜第10位，不過就算睇好正股又睇中個勢，揸隻輪都未必有肉食．隻輪明年6月到期，冇錯壽命夠長，但溢價58%，槓桿率13.1倍。咁嘅溢價，好難搵人齊齊玩。
國內汽車股隻隻跌，華晨（1114）收3.125元，跌5.3%，兩件Call輪9300同9298自然冇運行。9300係正常輪，收31.5仙，散18%，明年6月夠鐘，溢價38.1%，槓桿率9.9倍。揸呢隻輪，除非撞啱正股升得好勁，否則睇吓溢價，都知道好難搵食。9298數據似乎好過9300，壽命長啲，明年10月到期，輪價33仙，單日跌幅亦係18%，溢價低啲，係34.1%，槓桿率9.5倍又冇輸蝕得太多，不過呢件係鎖定回報輪，唔係單純睇表面數據，唔係散戶個個明解。
德昌（179）收9.95元，升20仙，Call輪9874收61仙，升15%，明年2月到期，溢價5.4%，槓桿率16.3倍，炒呢件，記得速戰速決。
章 盛