內地樓盤陸續來港展銷，由金豐易居主辦、今日開幕嘅「京滬渝房地產展覽會2003」，算係規模較大嘅一個。金豐易居安排上海「易居會」50個鑽石會員，同埋上海等內地發展商總共成百人，噚日包機扺港，近期新聞多多嘅金豐鴻運行政總裁田國強重親自接待，即刻帶隊去金紫荊廣場影番張相留念，晚上又設宴招待。
個團除咗出席今日嘅展覽會，大部份團友會在港逗留4日3夜，因為會去睇長實畢架山一號、恒基京士柏山、九倉擎天半島、新世界君頤峰，同埋嘉華嘉多利豪園……樓盤。
而今日嘅開幕酒會，會有上海、北京、重慶、武漢、瀋陽、深圳、澳門、香港同美國等地嘅發展商出席，陣容都算龐大。呢個展覽會一連3日，每日都有幾場講座，等大家可以對當地市道有多啲認識。
旺角朗豪坊建築特色，包括130米長嘅數碼天幕；同兩條分別40米同42米全港最長室內行人電梯，但要等到出年物業入伙後先有得睇。不過，數碼天幕頂層放煙花嘅情景，就可以先睹為快！
鷹君開始招待客戶參觀朗豪坊，其中商場4樓美食廣場係必到之地，因為嗰層唔單只睇到兩條室內行人電梯，頭頂重有樓高9層嘅數碼天幕。鷹君為咗等客戶體驗日後天幕放數碼煙花嘅情景，專登擺部機，模擬整個過程，順道做埋宣傳，一舉兩得。
一向多外籍租客嘅薄扶林區，近排一連出現5宗外籍租客入市買樓個案。中原謝家哲話，碧瑤灣18座低層A室，面積1580方呎，由瑞士客以405萬買入，呎價2563蚊。個客本身租開碧瑤灣，𠵱家每月按揭供款，重平過之前交租。
另外，同區嘅美景臺低層J室，2517方呎，成交價868萬。買家係英國人，啱啱賣咗喺倫敦嘅物業，套現轉投香港樓市。
除咗薄扶林之外，東涌嘅新盤都係外籍客入市嘅對象。美聯余柏話，幾日前有個澳洲客，喺東堤灣畔買咗個832方呎單位，打算買嚟退休自住，成交價148萬，呎價1779蚊。
港島東區一向有唔少日韓人士居住，鰂魚涌逸樺園噚日就搞咗個「日本之秋宴」，邀請啲日本人親臨逸樺園體驗生活，中原就配合呢個活動推出「逸理萬機」優惠。
噚日登記嘅日本客，頭5位經中原承租逸樺園，除獲贈租賃佣金，重送埋日本來回機票，總值超過16萬元。等佢哋客居香港租樓之餘，可以免費返日本探吓親戚朋友，一解鄉愁。
英格蘭國腳碧咸過咗西班牙搵食之後，受歡迎程度未減，就連新盤示範單位都要借佢宣傳。土瓜灣傲雲峰噚日開放3房示範單位，就用咗「我愛碧咸」做主題。
其中一間睡房最貼題，唔單止地毯用球場圖案，重有好多足球擺設；連衣櫃都貼咗一張碧咸嘅超級大海報，裏面當然唔少得23號球衣；牆上面重有好多張唔同角度、唔同表情嘅碧咸靚相，配埋23號床單、球鞋，足以令Fans尖叫。
不過發展商都要做好準備，黐好擺設，以免樓都未賣，示範單位就要整過。
蘭西
電郵地址：
