林嘉欣變身髮型師，還剪得似模似樣，原來她之前為拍《戀之風景》而學了三個月剪髮技巧，但她笑言做髮型師並不困難，只要對方夠膽作她的模特兒，她便夠膽為對方剪髮。
林嘉欣日前應鳳凰衞視邀請，到長沙灣一間髮型屋做髮型師，為女模特兒剪頭髮，並帶了私伙剪髮工具前來。見嘉欣手法純熟，在女模特兒的頭上手起刀落，還邊剪髮邊接受電視台訪問，不消一會兒便完成了。
嘉欣搞笑地說：「我以為去公園入面拍，諗住有花有草咁剪吓公仔頭。我唔知嚟髮型屋剪㗎，呢度有咁多真嘅髮型師，搞到我好緊張同有壓力。」
談到自己剪髮技術，嘉欣笑說：「馬馬虎虎啦！其實模特兒個頭髮之前已經剪好，我只係喺後面修吓，根本唔使點剪。」
嘉欣表示早前因拍電影《戀之風景》而跟髮型師學藝三個月，嘉欣說：「喺戲入面我有幾場幫劉燁剪髮嘅戲，所以我搵師傅教我，淨係學揸鉸剪都學咗大半個月，因為靠手指公郁好難，我咪不論刷牙或者睇電視時都手郁郁咁，搞到我隻右手起晒『枕』。」
問嘉欣學成後可有找相熟朋友作試驗品？她笑說：「我之前返台灣幫我個朋友剪咗個Bob頭，啲朋友話唔錯，亦試過幫爸爸、媽咪同細妹剪，爸爸就話剪得幾好。其實佢哋夠膽搵我剪，我咪夠膽剪，因為呢樣嘢同技術冇關，係睇有冇膽。」
採訪、攝影：馮美茵
