呢輪大市弱勢，最少都要跌兩日，噚日恒指早段雖反彈，但未幾又再散過，結果下跌27點收場，而成交則縮到只得106億元。跌市成交少，顯示沽售壓力不大，但噚日細價股卻走晒樣，好多隻都跌咗10幾個價位，下跌股（不計認股證）超過400隻，市場開始有恐慌氣氛。
噚日逆市而升嘅股票有182隻，大藍籌中，長和系表現最好，長實（001）同和黃（013）都上升0.5元，地產股則個別發展，希慎（014）、嘉里（683）、九倉（004）同新世界發展（017）呢幾隻大價股都有進帳，尤以新世界的大行買盤最活躍，由開市買到收市，最高掃到上4.65元，收4.575元，升0.1元，成交上升到2323萬股，成交金額逾1億元。
上月初，新世界曾上過7元水平，之後反覆走軟，月底配股，踩多兩腳，結果落到4.3元先企得住。呢兩個禮拜，新世界喺低位形成小雙底，噚日股價重上10日線，MACD亦出現入貨訊號，若升破頸線4.75元，初步可重上5.15元。10月30日，新世界在5.3元至5.1元間有一個下跌裂口，今次反彈應可回補。
新世界近期咁弱勢，主要係受過去年度大幅虧損所影響，但本港樓市已從低位回升，估計明年樓價可再有約10%的升幅，新世界的經營環境，肯定會有改善，而現年度（04年6月底結算），集團亦可望恢復盈利。
新世界大幅撇帳係要面對資產減值的現實，03年度，虧損48.1億元，包括撥備47.79億元，大部份與地產有關，佔33.9億元，其他有電訊及科技項目。由於集團負債仍高企，因此配股集資12.2億元，主要用作償還債項。大撥備和配股集資，有利集團今後建立更穩固的盈利基礎。
今年6月底，受到大量虧損及物業貶值影響，新世界每股資產淨值已由24.7元大幅下降至20.8元，減幅16%；配股後，再攤薄到19.2元，攤薄幅度7.7%，新世界現時股價大幅折讓76%，基金同大行近期趁低大手吸納，除看好樓市前景外，新世界股價跌得低殘，亦係原因之一。
郭兆誠