《鬼武者：無賴傳》金城武VS松田優作

有玩開《鬼武者》系列嘅Game迷一定對由金城武飾演嘅「鬼武者」明智左馬介同《鬼武者2》嘅柳生十兵衛非常熟悉，CAPCOM新作《鬼武者：無賴傳》中，兩大主角將有機會以格鬥戰登場！
記者：許福合

延續未解之謎
《鬼武者：無賴傳》分為自由及故事模式，前者任選角色對戰，而後者對熟悉《鬼武者》嘅玩家非常有意思，以故事形式進行，一啲《鬼武者1、2》都未解開嘅謎題，都有機會揭開。操作系統基本上同前作相似，招數當然包括有必殺技同連續技，若果使用《鬼武者》原有角色，重可見到佢哋使用看家本領㖭！

保留格鬥精髓
見到《鬼武者：無賴傳》嘅遊戲畫面，就知道場景會以3D立體為主，而且非常多元化，玩家可由草原打到竹林，即使上到船上亦可打餐飽，不過格鬥遊戲對移動有一定限制，例如玩家所控制嘅角色被固定喺一個範圍內，所以玩家完全可當作一個2D格鬥去玩，呢個正係格鬥遊戲嘅精髓所在，一攻一守，唔會變咗捉迷藏！新作同時更支援4人同時激鬥，好過癮。

對應機種：PS2
遊戲類型：動作
遊戲人數：1-4人
開發商：CAPCOM
(C)CAPCOMCO.,LTD.