謝霆鋒去年被判停牌一年，本月初他才正式復牌，不過昨日卻有消息指霆鋒又發生撞車意外。昨日本報致電其經理人霍紋希求證，她否認有關傳聞。
霍紋希說：「冇啲咁嘅事，以我所知霆鋒都冇買車，佢除咗早排因為拍戲而要揸車外，佢都冇揸過車。霆鋒𠵱家成熟咗，即使揸車都會有分寸。」那麼她曾否致電霆鋒提及此事？霍紋希說：「佢都知呢件事，佢話早排都有人喺網上話佢跳樓，咁佢死咗幾次啦，佢覺得係有人搞惡作劇。」而昨晚霆鋒則在北角拍攝電影《新警察故事》。
此外，霆鋒母親狄波拉昨日在電話中說：「我就冇聽佢講過，你知乜嘢詳情呀？唔好嚇我喎，霆鋒呢排喺上海、北京周圍飛，應該就唔會啦。」問狄波拉會否為霆鋒求平安符？她說：「信自己好過啦，求平安符係咪可以蒙住眼揸車呀？」
而霆鋒父親謝賢（四哥）昨日則在電話中說：「Short嘅！點會傳呢啲消息㗎？我啱啱先同佢通完電話，佢話拍完戲收工返屋企。」問四哥可會阻止霆鋒駕駛，他說：「點會啫！」四哥亦表示霆鋒復牌後都未有駕駛過。
採訪：比華利
採訪：朱倬誼、比華利