前晚無綫台慶的藝員大抽獎部份，司儀曾志偉當眾向廖碧兒和潘芳芳提水，造成不公平現象及有欺負老人家之嫌，而遭觀眾狂轟。無綫有見事態嚴重，昨日即時進行內部調查和翻看有關片段，誓要揪出造馬元兇。
無綫《萬千星輝賀台慶》前晚於將軍澳電視廣播城舉行，壓軸戲除了是揭曉「最喜愛的男、女主角」花落誰家外，還有藝員大抽獎環節。前晚台慶送出獎品包括五萬元現金、十萬元儲蓄戶口、約值十三萬七千的三菱Grandis七人車，以及約值六十萬港元的樟木頭御景花園洋房連俱樂部會籍，由港姐李嘉怡、廖碧兒、潘芳芳和黎宣輪流抽獎品。
黎宣抽獎志偉封口
李嘉怡先拔頭籌奪得十萬元儲蓄戶口，繼而到廖碧兒、黎宣和潘芳芳抽七人車。司儀曾志偉當着觀眾面前向廖碧兒說：「正話喺下邊（指獎品位置），呢次應該喺邊呀？」廖碧兒在志偉的明顯提示下抽中了七人車。
其後輪到潘芳芳和黎宣抽洋樓，志偉在黎宣抽獎時，未有給予任何意見，但輪到潘芳芳時，志偉即說：「頭先一個喺下邊，一個喺上邊，今次應該開邊度呀？」其時潘芳芳未有聽取志偉提示，揀了藍色鎖匙，志偉即大叫一聲「哎吔」，潘芳芳即轉拿起志偉提示的綠色鎖匙，結果她抽得洋樓。
由於志偉提水十分明顯，不少觀眾戥黎宣不值，認為志偉有欺負老人家之嫌，紛紛致電無綫和傳真到本報投訴及狂轟志偉，要求無綫重抽大獎。無綫高層有見事態嚴重，遂於昨日進行內部調查，並即時查看前晚抽獎錄影帶，誓要揪出幕後元兇。
有工作人員知結果
記者昨日致電台慶監製林嘉穎了解，他說：「抽獎結果全部係由黃龍德會計師樓嘅職員決定，無綫製作部冇份參與。不過，為防有藝員因為緊張得滯開唔到門，以為自己抽唔中，所以會計師樓職員會喺抽獎環節開始前幾分鐘，將有關獎品資料話畀一位場務同資料搜集員知道。萬一藝員抽中咗但開唔到門嘅話，場務同資料搜集員先至會做一個手勢提示，事前監製同司儀係完全唔知。」
林嘉穎又說：「所有獎品結果只係得幾個人知道，今日我已經向所有有份參與嘅工作人員同志偉了解過，亦都睇番有關錄影帶，但佢哋冇人同志偉講過，志偉亦都親口同我講佢事前係唔知，佢只係隨口講中，今次只係有咁啱得咁蹺啫。不過，我會提醒番所有藝員，叫佢哋以後遇上呢啲情況盡量唔好畀意見。」
而會計師黃龍德昨日亦聲稱志偉事前全不知情，他說：「知道結果嗰位無綫工作人員全程喺我哋視線範圍，佢冇同志偉接觸過，志偉只係亂估一通啫。」
「乜無綫咁鬼渣㗎」
志偉前晚亦矢口否認：「點會啫，同佢哋又非親非故，自己估之嘛，點知俾我一估估中，乜TVB咁鬼渣㗎！」亂估而能夠次次都估中，志偉可轉行預測六合彩！無綫方面及會計師的初步調查結果，實在難令觀眾信服，亦沒有為黎宣討回公道。
至於黎宣則很有風度，她前晚說：「我唔覺得係因為志偉提水而輸，係自己唔lucky，唔關志偉事。」
採訪：戴彩煥、卓寶花、楊潔雯
攝影：林德雄、何國豪
