前日美國宣布，計劃對中國部份紡織品重施配額，好多紡織股股價都受影響急跌，但有部份喺噚日已經企番穩。經紀黃話，唔排除係投資者停止神經過敏的沽貨行動，與此同時，部份外資行繼續出報告力頂多隻紡織股，亦係原因之一。
德永佳（321）前日股價大跌6.25%，噚日反彈1.9%，收5.35元，成交金額1066萬元，至於福田（420）就可能因為之前累積升幅太多，所以噚日繼續跌，收5.30元，再跌3.6%，成交2148萬元。
經紀黃堅持佢嘅工業股陰謀論，就係外資基金，特別係美資基金，仍然坐住好多德永佳同埋福田，就算早前減持咗一部份，但持股量仍然好勁抽，所以一眾外資冇辦法唔力撐，要再出報告替佢哋護航。
經紀黃重話，大部份外資行力撐紡織股的理據，真係好鬼街頭智慧，不外乎係德永佳同埋福田生產嘅針織布，唔係直接出口去美國，而係賣俾OEM成衣生產商，所以配額對佢哋影響唔大，真係信不信由你。
慕容小初