港股噚日牛牛皮皮，恒指收11845，跌27點，成交106億元。點知收市之後無耐就發生似乎係針對英國的土耳其連環炸彈襲擊，加深金融市場對恐怖襲擊的憂慮。早前日本因為想派自衞隊到伊拉克而接到恐怖襲擊的警告，拖累日股急挫。今次英國的利益，在土耳其直接遭到炸彈襲擊，看來滙豐（005）將作出可觀調整，大市極可能下試11500水平，如果守得穩應該偷笑。
物美商業（8277）揀正今日上市，真係有啲生不逢時。不過，管理層臨到上市前一日，高調公布獲IFC買入800萬股H股，相當於H股總發行量的9.1%，管理層擺明想搞好氣氛，令首日上市股價有好表現。但今次公司以上限6.22元定價，上市後再上升的水位有限，最慘就係近期新股氣氛轉淡，隻股集資規模又唔似修身堂（8200）細細粒容易食，所以難作過份憧憬。
建滔（148）雖然表明話終止洽售依利安達（033），並會繼續持有依利安達24.4%股權作中長線投資，但依利安達仍然腳軟，噚日再挫7.7%，收1.43元，成交1443萬元。黑客話，此股由1.20元抽上嚟，原定出售目標是1.55元，現時交易拉倒，恐怕股價會打回原形，即係可能會跌番落1.20元都唔定。
新海能源（342）最近雖三度獲惠理基金增持，但股價再挫8%，其實大市成交有萎縮現象，游資閒錢唔多，令到唔少二三線股都缺乏承接力，散戶亦唔敢太勇，惠理基金點石成金呢支歌暫時都好難唱得動聽。
阿 虎