好多女仔都鍾意發明星夢，以為紅咗就可以名利雙收，思想認真單純。某新晉女歌星自從俾佢間經理人公司發掘咗出嚟後，佢嘅老闆就對佢虎視眈眈。
有次個老闆叫得力助手通知新晉女歌手，去酒店某房間，話老闆要對佢訓話，叫佢即刻上去，女歌星深知夜晚上房唔會咁簡單，所以用盡方法話自己唔得閒，結果嗰晚就甩咗身。
個老闆當然好嬲啦，第日返公司鬧咗個女歌手一輪，之後就順手掟佢入雪櫃，公司有乜嘢好嘅工作都唔會有佢份。最慘係新晉女歌手簽咗好多年畀呢間公司，想轉行都唔得，所以佢𠵱家都好後悔揀錯碼頭。不過我馮仁昭認為嗰位女仔應該知道娛樂圈冇咁簡單，所以奉勸所有發明星夢嘅細路女，想上位都要帶眼識人呀！
黃子華同蔡少芬噚日喺將軍澳為新劇《棟篤神探》試造型。問三年冇拍劇嘅子華，有冇信心收視再創佳績，佢話：「一定做唔番好似《男親女愛》咁，我咁耐冇拍劇會退步，要睇蔡少芬做成點。」問佢擔唔擔心同蔡少芬傳緋聞，子華話：「希望唔好冇，我唔使主動都會有緋聞，我就有呢條命。」
蔡一傑呢排除咗忙於宣傳個人大碟外，重成為「收腰帶」廣告代言人，噚日就喺柴灣拍廣告。傑仔出晒名係「大隻仔」，佢噚日大晒二十七吋腰、三十七吋胸嘅健美身材，不過佢後尾竟用西裝遮遮掩掩，重好怕醜咁話：「唔好影喇，怕醜嘛。」查實佢成日都做運動喼弗，都想畀人睇吓努力成果㗎，有乜好驚啫！
混血女模Rosemary噚晚去咗尖沙嘴某酒店擔任美容比賽評判，佢話覺得模特兒唔可以做一世，所以將來有計劃做生意，Rosemary前晚露口風話：「遲啲我會同車、珠寶牌子合作，用我個名嚟出啲產品，係一個好大嘅project，亦係一張長期飯票。」唔知呢張飯票夠唔夠養埋佢個媽咪Julie呢？
馮仁昭噚日聽到梁思浩喺電台節目度，講番無綫台慶排位，佢話好彩企喺第二排，但就話有個半甘草演員冇份做台慶，但都有返公司，重問思浩可唔可以讓個企位畀佢，但被拒絕。思浩雖冇開名，但就話明白點解對方叫攝石人，擺明暗示係蕭亮。以馮仁昭所知，係蕭亮主動聯絡監製演出，佢喺現場出現都無可厚非，所以馮仁昭覺得思浩咁樣唱人唔係幾啱。
吳鎮宇噚日去尖沙嘴擔任OGC高爾夫城嘅開幕嘉賓，鎮宇話以前香港冇大規模嘅高爾夫場地，所以通常去深圳打，其實太太都唔係咁鍾意。問鎮宇係唔係怕喺內地發生類似吳啟華、錢小豪事件？佢笑住咁話：「如果影到就心甘命抵，最難搞係影唔到但就有好多揣測。」不過馮仁昭就認為行得正，企得正，有乜好怕喎！
