Beyond三子有見今年舉行的演唱會反應熱烈，遂決定明年再度出擊，於紅館或添馬艦舉行演唱會；而恒藝亞洲亦準備與電影公司合作開拍電影《Beyond前傳》，由新人扮演Beyond四子，講述他們的奮鬥故事。
月前在紅館舉行的《Beyond超越BeyondLive2003》演唱會反應熱烈，有份製作的恒藝亞洲有見及此，遂力邀Beyond三子黃家強、黃貫中和葉世榮明年再度合作，於紅館或是添馬艦舉行演唱會，為Beyond二十周年作一個總結。
恒藝亞洲負責人丘亞葵日前接受訪問時說：「今年係Beyond二十周年，而出年正好作為佢哋二十年嚟一個總結；早幾日我同Beyond佢哋開會傾過，準備出年再度出擊，目前我已經入咗紙去紅館申請檔期。」
丘亞葵又說：「我亦有一個構思，就係考慮喺添馬艦舉行演唱會，因為戶外環境對佢哋演出相當合適，對觀眾嚟講亦都有份新鮮感。」
原來除了演唱會外，丘亞葵亦計劃開拍一部關於Beyond前傳的電影，為演唱會造勢，故事內容主要講述黃家駒、黃家強、黃貫中和葉世榮的奮鬥史，丘亞葵說：「目前我同幾間電影公司傾緊合作呢部《Beyond前傳》，由於製作費所限，我哋主要會搵新人演出，扮演家駒、家強、阿Paul同世榮，但電影結尾部份就會搵Beyond三子客串演出。」
採訪：戴彩煥
