劉德華近日迷上Timberland靴仔，他特地在日本搜購限量版白色，並日日穿着。華仔表示窄身衫襯闊腳褲的差利卓別靈look是他至愛，而Timberland靴仔亦最啱襯闊腳褲。
劉德華向來穿衣有其獨特風格，他平時喜歡以casual自然的打扮示人，不過他對鞋履卻特別有研究，他近日瘋狂迷上Timberland靴仔，更同一款式購入三種色，方便襯衫。
近日華仔經常頭戴鴨嘴帽、穿T恤加外套，襯Baleno闊腳褲及一對白色Timberland靴仔。華仔透露他家中還有同款的淺啡色及藍色，而白色那對是他特別在日本搜購的限量版。
華仔說：「我搵咗對鞋好耐，因為白色比較少，之前杜汶澤幫我喺美國買咗對，點知唔啱size，最後佢自己要咗，佢重成日喺我面前炫耀，好彩我之後去日本拍戲，趁機會去搵囉，終於都俾我買到。」
華仔表示特別喜歡穿着窄身衫襯闊腳褲，他說：「因為我好鍾意差利卓別靈嘅形象，我覺得佢咁着好可愛，不過𠵱家唔興窄身衫，所以我都少着咗，呢款鞋最托得起條闊褲，又襟着，所以咪一次過買幾隻色囉！」
華仔表示穿Timberland靴仔最忌窄腳褲，因為鞋形大，會顯得雙腳太重。華仔又謂他通常會以同一色調衫褲亮相，他說：「我唔可以着一啲太鮮色嘅衫，唔襯我，如果一定要着，就只可着同一種色。」
採訪、攝影：胡比
