【本報訊】本屆區議會選舉的最大特色，是除了民生議題外，7.1大遊行的民主訴求延續成選戰熱點。最能代表這股聲音的人物，莫過於在反23條一役中表現勇猛的大律師公會前主席梁家傑，他天天出動為民主派候選人洗樓助選，明年立法會選舉，他極可能親身披甲上陣。 記者：何文雯 蔡建豪
距離區選投票日還有兩天，梁家傑昨晚聯同余若薇、吳靄儀、湯家驊和李柱銘，五位大狀聯袂到立法會議員何秀蘭和葉國謙對壘的西環觀龍區，為何秀蘭拉票，並合力推倒象徵保皇黨的紙牌。
助選期間一幕幕溫馨場面，令資深大律師梁家傑十分感動，他接受本報專訪時，細數往訪深水埗蘇屋、荔枝角、鑽石山等草根階層地區的情景，「有位阿叔攞住兩大袋嘢，都特登放低同我握手，多謝我講解23條嘅工作；有個阿婆請我入屋坐，喊咁口話仔女唔理佢。」
喧賓奪主的場面難免，梁家傑笑指每到一區，都有市民表示支持他參選下屆立法會，「搞到我要提醒對方，今次唔係我，而係我隔籬嗰個（候選人）參選。」
對於明年會否參選立法會，梁家傑坦言：「其實有樣嘢一直好困擾我：到底係以超然嘅法律專業地位發表意見，定係加入建制做議員做得多嘢？」多位友人勸他，不能永遠以「大律師公會前主席」身份就社會事務發言，但市民這次表現的熱情支持，才更令他認真考慮參選。
這次助選，梁家傑每周出動五晚，最後一周更一連拉足七日票，犧牲不少私人時間，家人也忍不住投訴，若自己投入參選，身為三個孩子的父親，梁家傑的妻兒會怎麼想？「幾個月前有人提議我參選，我第一個處理咗嘅問題就係家人嘅睇法。」梁家傑的太太已表態支持他參選，但提醒他，現年十歲的兒子「再過幾年就唔要你」，對此梁家傑堅持無論如何，一定預留足夠時間陪伴家人。
除了私人時間，一旦參選，梁家傑有心理準備金錢收入會少一大截，「雖然我唔打算放棄大律師專業，但最賺錢嘅長案一定唔接得，否則對客戶同選民都唔負責任，兩、三日嘅上訴案應該就冇問題。」四十五歲的梁家傑感歎，這次參政機會從工作和家人的角度看，「如果嚟遲五年就最fit（合適），但人生嘅嘢，唔係樣樣你揀。」
