秋風起，正是食大閘蟹的好時機，周潤發夫婦昨日拍拖到九龍城買大閘蟹。發哥挑選靚蟹有板有眼，他認為八両重的蟹最好，而且要蒸約二十五至三十分鐘，以防蒸不熟。
周潤發夫婦昨日下午四時許在九龍城出現，記者見他們進入了賣大閘蟹的老字號新三陽，店員熱情地拉着發哥傾談，然後向他展示了新運到的一批陽澄湖大閘蟹，看來發哥與此店夥計十分稔熟。
發哥拿起了二百二十八元一斤的一隻大閘蟹在手秤一秤後，又在蟹殼面輕嗅，並用手指篤蟹的眼睛，然後又將蟹放回去，之後他再拿三百二十元一斤的大閘蟹來看，翻了兩翻，即一口氣買下十二隻蟹，花了約一千六百元。
記者向店員鴻叔了解，他說：「發哥係老主顧，成日嚟幫襯，有時佢得閒都會嚟傾偈，佢係我哋嘅老友記，一啲架子都冇，今日我哋介紹佢買每隻八両重嘅蟹，發哥揀蟹都有一手，今次佢買咗一打三百二十八蚊一斤嘅大閘蟹，我哋都有打折畀佢。」
事後記者致電發哥，他說：「頭先同老婆去九龍城買餸煮飯，今晚有朋友嚟食飯，所以買咗好多嘢，今晚主打菜係大閘蟹，十月後嘅大閘蟹係最啱時候食，食八両重一隻夠肉哋嘅就最好，我鍾意幫襯新三陽，因為佢哋係老字號，如果啲蟹有問題可以退貨。」
而發哥夫婦買大閘蟹後，經過賣水果的永富食品店時，店主輝哥即叫住他們，並送了十個鴨嘴梨給發哥，輝哥說：「佢哋係老街坊，成日嚟幫襯，發嫂成日喉嚨痛，所以我咪送啲雪梨畀佢兩公婆，煲雪梨水滋潤吓。」
後來發哥夫婦又進入成金海產雜貨，花了三十元買臘鴨和鹹魚，再到街市買芥蘭和一條魚回家。發哥昨日在電話中說：「今晚除咗大閘蟹，重會炒青菜、煮煲鹹魚臘味飯，然後再蒸條魚就夠啦！如果今日唔係有朋友嚟，我同老婆食得重簡單，清清地就得。」
採訪：陳月媚
攝影：陳慧安
