黎姿早前拍攝內地護髮產品廣告，但想不到開了兩日工，便拍到頸部軟骨輕微移位，出現劇痛，故此近期她要在百忙中抽空接受物理治療，黎姿對此不禁慨歎說：「世界難撈！」
黎姿早前為內地護髮產品「髮救星」拍攝廣告，她在廣告中不但須經常撥弄頭髮，又要不斷搖頭，故此開了兩日工，便開始感到頸背部位隱隱作痛。
初時黎姿以為只是普通肌肉痠痛，沒有理會，但後來頸和背部肌肉劇痛難耐，於是在助手陪同下往看醫生。照過X光後，醫生指其頸部軟骨輕微移位，壓着部份肌肉神經，要求她定期做物理治療。
黎姿日前接受電話訪問時說：「𠵱家世界真係難撈呀！我本身都有肌肉勞損，加埋今次真係傷上加傷。我都唔想加深個傷勢，所以會定期做物理治療，朋友重介紹咗個氣功師傅畀我，做咗一、兩次後，感覺唔錯，呢位師傅幾好手勢。」
近期黎姿忙於拍攝無綫劇集《金枝慾孽》，須日以繼夜開工，但黎姿卻說：「拍劇雖然辛苦，但我覺得如果劇集推出時有好收視，咁辛苦都值得，以𠵱家嘅拍攝進度嚟睇，我諗出年先可以拍得晒。」
