自己做：雞仔嘜毛毛拖<br>Fit腳形暖笠笠

天氣預告周末氣溫會跌至15度，大家做好禦寒準備未？除例牌織織頸巾、冷帽之外，計我話一切最好由「腳」開始！事關好多人都有手腳冰凍的煩惱，而腳凍就會令到全身更加冰冰冷冷，非常唔舒服！趁寒冬未到，不妨親手做一對暖笠笠的毛毛拖，包保暖上心頭！

記者：吳佩璇　攝影：陳陶鈞

軟綿綿的毛毛拖，望落已經暖笠笠。加上是DIY的緣故，着落就特別舒服。市面的毛毛拖，大多只會分大、中、小幾個Size，腳大的未必着得落，腳細的着得落，側邊又會通風，失了毛毛拖保暖的功效。所以不妨用針線DIY，不算難做之餘，又能做到一雙至Fit自己腳形的拖鞋，夠貼身就包保暖笠笠啦！

材料
毛毛絨布半碼　$18
繡花線1條　$3
公仔手工藝包　$25
紙朴　$8

先按自己的腳形，勾畫出鞋子的Size(畫時毋須預得太貼，一般為距腳位5cm，畫一橢圓狀便可。)然後共裁下4幅。裁剪時可預留1-1.5cm的黹口位。

鞋底可先用熨斗燙上紙朴，可增加鞋底的堅固度及更方便裁布。

鞋面的半橢圓面積要比鞋底的為闊，一般比鞋底的左右兩邊多預留1.5cm，長度則約是腳長的一半。同樣裁下4幅及留1-1.5cm的黹口位。

先用兩幅布縫鞋面，縫合時布底貼布底。想美觀一點，可在平腳的位置摺起一邊位，並以繡花線縫上斜紋。

之後便可將縫好的鞋面與鞋底縫合。方法是將兩幅鞋底布面貼布面，然後將剛才縫好的鞋頭攝在中間，依黹口位將三幅布一同氹氹圈縫起(記住預留一開口位將鞋反轉)。

按喜好在鞋頭加上如鈕門等點綴。而我則用了坊間的雞仔球手工藝包，折開包裝，依其材料及說明將冷球縫上，並用白膠漿貼上眼、嘴、翼及雞冠。

麖絨鞋富民族Feel
細路仔東奔西跑，成日都會着甩拖。所以冬天喺屋企不妨着輕便鞋仔。繡花鞋不但有中國Feel，細細隻其實都幾得意，最啱小朋友。以下提供的紙樣參考，可按腳的大小自行放大或縮小。留意將三幅布縫合時，由於兩邊的布長比鞋底的布要長，所以邊縫要邊「就」位，否則完成後便會皺起。

材料
麖絨（視乎腳的大小，參考圖為12"x24"）1塊　$10
毛毛球2個　$8
繡花線1條　$3

依紙樣(圖一)裁下共四幅鞋側及兩幅鞋底的布料。裁剪時要預留1-1.5cm的黹口位。

對好接駁位，將兩幅鞋側及一幅鞋底縫合。

縫好後將鞋子反轉，鞋邊以毛氈針步縫好。