「維港巨星匯」提交初步收支報告，剛好蝕咗一億，由政府包底，條數啱啱好，連唐英年都話乜咁齊整。
姑勿論「巨星匯」是否造數，唐英年都會頭痛，佢話要設立一個調查委員會，誰是委員，至今不知，睇嚟搵人捱義氣都唔容易。除咗花時間之外，啲委員會受到華洋兩派嘅壓力，商界嘅有頭有面人物，通常在華洋兩界都吃得開，你估咁容易為一場大騷而得失外國商人乎？
鬼佬R為咗表示支持詹康信，特登傳來電郵，講明係「Gweilo'sViewonHarborFest」。又附上老牌記者KevinSinclair喺《南華早報》嘅文章，內容當然係讚賞詹康信，支持巨星匯兼且痛罵好多人只識彈唔識做啦（譬如劉慧卿）。Sinclair寫作數十年，文筆辛辣，有佢在《南早》為美國商會打氣，外商士氣大增，鬼佬R話佢成班美國老友紛紛寫電郵支持詹康信，一於同啲百彈議員硬碰硬，佢哋覺得政府或立法會因巨星匯而譴責美國商會、盧維思，就會貽笑大方喎。
唔少中文報紙評論員就要盧維思問責，英文傳媒為佢撐腰，一場華洋大戰，不知誰勝誰負。鬼佬R等認為「滾石」表演咁好睇，你哋嘈乜嘢噃？左丁山話，睇騷確係好睇，但係政府係唔應該用公帑辦音樂會，今次因沙士特殊情況，辦一次咁多嚟沖喜，未可厚非，但以後就冇理由再搞咯。