名模歐陽妙芝及LisaS.前晚往中環，為銀器店示範首飾。計劃明年底結婚的歐陽妙芝表示已開始籌備姊妹團名單，一找之下接近十人，她指男友Steven笑言擔心姊妹團陣容較戥穿石更鼎盛，更怕眾姊妹的高度會蓋過他們。
名模歐陽妙芝及LisaS.前晚往中環國際金融中心，為銀器首飾店ThomasSabo開幕活動示範首飾，兩人均賣口乖表示最愛佩戴銀器飾物，因配襯簡便或隆重的服裝都適合。
計劃與男友Steven明年底拉埋天窗的妙芝表示，現階段專心工作之餘又要忙私事，她說：「我嘅工作表已經排到出年三月，但係同時又要籌備結婚嘅事。」
早前好友陳嘉容透露自薦做其姊妹團成員，妙芝說：「梗係有預佢啦，伴娘就係我一個好好嘅朋友，平時我做show，呢個朋友係幫我做dresser（換衫），我對住佢一早肉帛相見㗎啦！其他姊妹團成員有啲係我嘅舊同學，𠵱家計吓計吓，陣容都幾鼎盛㗎。」
問妙芝其男友是否亦已開始張羅戥穿石名單？她說：「佢都開始籌備緊㗎啦，佢講笑話驚我姊妹團啲人數多過佢，其中有啲又係模特兒，重驚班兄弟唔夠高，會好肉酸㖭。」
而LisaS.則表示聖誕節會全情投入工作，賺錢至上，她說：「我打算出年放個長假，返去南非間屋度歎世界。」問她有否留意緋聞男友吳彥祖與李嘉欣在電影《Miss杜十娘》中有床上戲？她只說：「NoComment」。
採訪、攝影：JessicaNgan
