特區政府終於死死氣宣布，中環添馬艦地皮，本來計劃用嚟「發展」，建造政府新總部、立法會大樓、展覽館文娛中心等等，𠵱家，因為政治環境等理由，繼巨星匯醜聞大Party散檔，宣布無限期擱置嘞。
添馬艦呢塊吉地，係歷史遺留嘅問題。喺殖民地時代，由於經濟長期繁榮，地價尺尺黃金，九七前途問題出現，中方對眼，就猴實用嚟泊英國軍艦嘅添馬艦，向英方施加壓力，要英國佬將添馬艦填海，以為喺收回主權之後，呢塊地又會生多好多隻金蛋。
嘿點知，因為命運之神殘酷嘅愚弄，英國管治香港，就話點鐵成金啫，換咗支旗，再沐董而冠，香港呢塊寶地，六年幾以來，變成一大片爛泥。添馬艦就算填咗交畀你接手都冇用，一來已經冇咗人哋支國際信心爆棚嘅神仙棒，兼而換過另一隻手嚟指點江山，變咗點金成鐵，點鐵成銅，點銅成豆腐渣，香港嘅信譽、資產、國際地位，全部蒸發。添馬艦用地，最後用途，就係免費「租」畀蔡素玉所屬嘅愛國政黨，吹雞叫齊維園阿伯，開番一百席海鮮餐，慶祝楊利偉神五號升天或者回歸幾多周年，四圍插滿彩旗，由阿董親臨剪綵。
可憐有一班地產商，當年誤信明天會更好，陪呢個政府一齊癲，交足預審申請書，又使咗一百幾十萬嚟做報告，以為齊齊投標。點知董班子一聲唔玩，地產商就蝕咗一大筆發白日夢嘅成本，𠵱家要向特區政府索償。
咪當如交學費算囉。點止添馬艦呀，全港處處都有大片空地，呢度填海一忽，嗰頭開闢一處，淨係啟德舊機場嗰一塊，丟空到𠵱家，嗰陣時又話要建乜建物，豪情萬丈，當家作主，吹一輪水，𠵱家又係變咗養老鼠。
其實，點止添馬艦應該用嚟搞愛國免費大食會，連啟德機場，都應該開放恢復用途因為特區已經不斷萎縮，變為中國城市，當初起個赤鱲角，以為九七後香港會拍得住紐約倫敦，一日有一萬班飛機往來全世界，但𠵱家航空量大縮水，如果開放番啟德機場，不止飛機升降量夠用番，啲機場工人，重可以間唔中喺條跑道上面打四圈麻雀㖭。
而赤鱲角新機場，就不妨改建為「香港明天會更好泡沫博物館」。將江主席嘅題詞搬入去展覽，再由各大銀行捐贈幾萬張負資產銀主盤嘅樓契，建多個阿董嘅銅像，一齊開放畀自由行班大陸遊客參觀，等東有添馬艦，西有赤鱲角，等佢哋分享吓：哈哈哈，原來香港人，曾經有過一個咁美好嘅夢境。
傳真︰2623-9278
電郵︰