任總噚日去人民大會堂，同周小川簽人民幣合作備忘錄，財爺唐英年同馬時亨都有去捧場，之前重一齊見咗副總理黃菊。
唔講唔知，原來馬仔做咗官咁耐，今次係第一次入人民大會堂，因為佢每次去北京拜會財金官員，多數都只係去人哋嘅辦公室見面。
馬仔噚日下午臨離開酒店，都不忘向八方讚金管局幾句，佢話今次搞人民幣業務，金管局做得好好，政府其實參與得好少，而今次畀外界一個印象，好似成件事早咗搞掂同公布，其實只係大家口密，加上之前一直有風吹出，話年底先會有眉目，實在只係有份搞嘅單位預鬆啲時間啫。
講開馬仔，有人笑話煲呔娶新抱冇請佢，八方後來聽聞，馬仔其實幾個星期前已經收到去觀禮同園遊會嘅邀請，只係冇請佢飲，邊係乜都冇份啫？
（圖右起）馬時亨跟住唐英年同駐京辦主任梁寶榮，去睇任志剛同周小川簽人民幣合作備忘錄嘅儀式。
傳真︰2623-9278
電郵︰