唔使問阿貴，噚日最熱門的話題當然係修身堂（8200），上市首日股價勁升，收0.78元，比起招股價0.25元足足高出0.53元，即係212%。
由於修身堂招股期間，經紀陳曾經推介過，話一定有得炒，家陣隻股勁升，小初當然以為經紀陳賺咗唔少，點知佢就搖搖頭，話根本冇貨在手，噚日又冇追貨，點會有得執？
經紀陳又話，修身堂size細細，幕後人又唔放貨出街，股價想升幾多就幾多，唔好話升2倍，就算升10倍佢都唔覺得驚奇。不過，炒呢類股風險高，要玩真係要食定驚風散。
講完高風險股，經紀陳就推介理文造紙（2314），莫非食過番尋味？佢話隻股即將公布中期業績，據講表現超過招股書預期，而幫佢上市嘅證券行，將隻股目標價一再調高，因此市況雖然陰陽怪氣，但佢仍然對呢隻股有信心。
理文造紙噚日跌0.94%，收5.25元，成交股數127.6萬股，金額671.9萬元，成交較之前縮減，反映沽壓唔大。
慕容小初