英國女星姬蒂碧金素爾（KateBeckinsale）喺新作《妖夜尋狼》入面形象大轉變，佢今次唔係《珍珠港》嘅俏護士，亦唔再演《情有獨鍾》呢啲搵戲嚟做嘅愛情古仔，反而變成一個勇敢強悍嘅殭屍狩獵人，不過觀眾似乎幾受落，部片喺美國一開畫就成為票房冠軍。
姬蒂飾演嘅莎蓮係長生不死嘅殭屍，佢發現原本係殭屍貴族日間守護獸嘅萊根族人狼，準備策動叛變殺清殭屍貴族，莎蓮見其他殭屍不以為然，惟有孤軍作戰。而呢部上年九月開拍嘅電影，最惹人關注嘅係當時重係姬蒂男友嘅米高辛（MichaelSheen）都有份拍，但係拍完後姬蒂已經戀上導演蘭懷斯曼（LenWiseman），米高最後黯然退出，而姬蒂六月重已經訂咗婚㖭。
不過我羅拉就比較關心戲嘅內容多啲，我發現《22世紀殺人網絡》嘅影響真係好鬼深遠，《妖》片導演似乎唔多唔少都有向佢取經，入面無論係主角嘅造型、場景以至氣氛都頗有《22世紀》嘅感覺，如果戲入面揸雙鎗嘅姬蒂戴埋副超，真係以為佢頂咗嘉莉安摩絲（CarrieAnne-Moss）扮Trinity㖭呀！