娛樂圈烏煙瘴氣就係人都知㗎啦，之不過社交界亦有唔少亂七八糟嘅事。好似早前有個名媛同富豪離婚之後，佢同啲仔女一齊住，富豪每個月都會畀一筆生活費佢哋，如果名媛唔太大使，生活絕不成問題，不過佢𠵱家好鍾意出嚟蒲，更成日食軟性毒品，又經常飲醉酒，呢排佢重癲到帶埋啲男人返屋企搞嘢，完全冇理啲仔女嘅感受。
其實名媛嘅仔女都寧願跟阿爸住，唔想跟媽咪，不過富豪唔想再刺激佢前妻，仔女撫養權惟有遲啲先再同佢傾喎。名媛可能因食得軟性毒品多，所以成日疑神疑鬼，猛話自己喺屋企見到污糟嘢，晚晚要蒲到天光先敢返屋企，佢啲朋友話佢𠵱家情緒唔多穩定，所以成日都想開解佢，但佢都聽唔入耳啦！
《第五元素》女星美娜祖維華茲（MillaJovovich）早前去日本嗰陣，俾人偷拍到同日本國寶中田英壽喺東京撐枱腳，原來當時佢兩個一齊俾Canon睇中斟拍廣告。而個廣告日前喺日本雜誌曝光，聽講呢個數碼相機廣告有兩個版本，當中都係講佢兩個喺人海裏面尋尋覓覓同埋邂逅。佢兩個因為太忙，夾唔啱時間，所以呢兩個廣告都係合成㗎！
組合Sky噚日接受訪問，有報道指佢哋有成員因為出席公開場合，冇着贊助商波鞋，結果搞到贊助商嬲而臨時抽起唱片啲廣告，所以唱片要延期推出，噚日成員Yani就招供係自己嘅錯，但已經同贊助商及其他成員道歉，而唱片亦可以如期喺今日推出，睇佢公司真係要睇實呢五個仔，唔好畀佢亂。
英皇2T嘅劉思慧（Maggie）同蔣雅文（Mandy）一齊擔任BeautyTech睫毛液嘅代言人，而老闆娘陳妙瑛亦有到場。Mandy同Maggie齊齊以新形象示人，Maggie着tubetop襯皮褸，Mandy就着晒短裙仔，但係始終都敵唔過老闆娘陳妙瑛嘅低胸裝，老闆娘自己咁搶鏡，使乜搵代言人呀！
早兩日台灣傳出趙薇有新戀情，男方係大陸海協會會長汪道涵個仔，𠵱家佢兩個正值熱戀期。其實呢單消息，早兩個月喺上海已經傳得好行，不過傳媒始終影唔到兩個主角一齊嘅相，又冇男方嘅實質資料，所以得個傳字，冇見過報。單新聞寫咗出嚟之後，雖然趙薇暫時都未有回應，不過照事件睇嚟，呢單料都係堅嘅居多。
錢小豪喺上海俾人撞正背妻偷歡，死撐話只係女方太過熱情，主動去拖佢隻手。噚日佢細佬錢嘉樂喺無綫排台慶時俾人問到呢單嘢，雖然嘉樂話小豪係佢阿哥，自己點都會撐佢，但就提醒自己阿哥話：「始終我哋係東方人唔係西方人，西方人一見面就kiss，有機會我會同佢講吓，唔好俾人誤會。」唉！究竟係誤會定係真有路，就真係佢自己先知喇！
